ORANJESTAD (AAN): Diabierna mainta e hombernan D.R.A. di 29 aña, R.D.P. di 28 aña, y e muhenan L.T. di 23 aña y K.D. di 22 aña a
presenta den Corte pa scucha e decision di Hues den e caso penal cu Ministerio Publico a cuminsa contra nan. Ta asina cu e hombernan ta encarcela y e muhenan ta liber.
Luna pasa, ora di tratamento di e caso, Fiscal a bisa cu e ta haya e hombernan D.R.A. y R.D.P. culpabel di pasa droga den KIA via Drone y cu e muhenan L.T. y K.D. ta complice. Fiscal a exigi pa D.R.A. y R.D.P., 18 luna di prison di cual 6 luna ta condicional cu 2 aña di prueba. Pa e muhenan L.T. y K.D., Fiscal a exigi 360 dia di prison di cual 258 dia ta condicional. Pa tur cuater, Fiscal a pone e condicion cu durante e tempo di prueba nan ta cay bou guia di Reclassering.
Sentencia: Hues a bisa cu e ta haya cu D.R.A. y R.D.P. ta culpabel di pasa droga cu Drone den KIA. Hues ta haya cu e muhenan L.T. y K.D. ta culpabel di complicidad o sea a yuda. Hues a mustra cu tin combersacion via WhatsApp entre e parehanan caminda claramente e muhenan sa cu cosnan ilegal tabata tuma lugar.
Pa cu e castigo, Hues a bisa cu e ta tene cuenta cu a uza Drone pa pasa droga den KIA. Hues a bisa cu ta conoci cu droga ta malo pa salud di hende y ta causa criminalidad. Hues ta haya cu loke ta haci e caso mas serio ta e hecho cu a trafica droga den KIA.
Hues a sigui bisa cu e ta tene cuenta cu orientacion di castigonan pa casonan similar. Hues a condena e hombernan D.R.A. y R.D.P. na 18 luna di prison, di cual 6 luna ta condicional cu 2 aña di prueba. Hues a ordena cu durante e periodo di prueba, nan ta cay bou guia di Reclassering. Hues a condena e muhenan L.T. y K.D. na 9 luna di prison di cual 6 luna ta condicional cu 2 aña di prueba y cu nan tambe ta cay bou guia di Reclassering.
