Pasaheronan riba crusero Carnival Freedom nada contento cu a keda sin bishita Aruba

Nan a djis haya un compensacion di $100 --- MIAMI: Pa awor ya ta casi henter mundo a haya sa, cu e barco crusero Carnival Freedom a sali riba un viahe di 8 dia pa celebra Pasco, pero a wordo prohibi di drenta tanto Bonaire como tambe Aruba.

   Di tur e ocho dia ey, e unico isla cu nan a bishita tabata Curacao.  Y awor pasaheronan cu a caba di baha di e crusero, ta nada contento y ta furioso cu e compania a ofrece nan djis un voucher di $100 pa e ‘molester’ aki di perde chens di bishita Aruba y Bonaire.

   Nan sa cu ora bo tuma un viahe crusero durante Pandemia, e riesgonan ta halto cu e schedule lo no bay segun bo gusto.  Loke tin nan disgusta ta cu Carnival Freedom a corta nan hala y nan chens di disfruta di nan vacacion, y pa colmo no kier a divulga ta cuanto hende a test positivo pa Covid-19 riba e barco.

   Nan a bira e di tercer barco crusero cu siman pasa tabatin hende abordo cu Covid-19.  E otro dosnan tabata Odyssey of the Seas y tambe Symphony of the Seas di Royal Caribbean.

   Pasahero di Carnival Freedom, esta Ashley Peterson a comparti un carta cu nan a ricibi di e Capitan cu tabata ofrece un gift voucher di $100, ofreciendo disculpa cu a corta 2 di e 3 islanan, y sigurando pasaheronan cu tur protocol a wordo sigui pa nan keda safe.

   “Hendenan a gasta miles di Dollar riba e viahe crusero aki, y a escoge e ruta aki debi na e islanan ABC.  Awor riba un crusero di 8-dia nos a bishita solamente un isla.  Y nan ta kere cu $100 pa cada camber ta suficiente compensacion?”  Esey ta loke el a pone riba Twitter.

   E carta di Capitan ta indica tambe cu e contagio rapido cu e variante Omicron ta impacta con e islanan ta reaccionando hasta pa casonan chikito di pashent cu Covid.  E crusero sa cu e cambionan inespera aki ta un desapunto.

   Carnival Freedom tabata transportando 2.497 pasahero y 1.112 miembro di tripulacion, a sali Diasabra 18 di December for di Port of Miami pa un viahe di 8 dia rond di parti zuid di Caribe, y e tema tabata ‘Christmas’.  Riba su viahe, e tabata poni pa bishita Curacao riba Diamars 21 di December for di 8:00 am te cu 5:00 pm.

   Diaranson 22 di December e tabata poni pa bishita Bonaire for di 8:00 am te cu 11:00 pm.  Diahuebs 23 di December e ta poni pa bishita Aruba for di 8:00 am te cu 5:00 pm.

   Diadomingo 26 di December pa 6:00 am el a drenta bek Port of Miami na Florida.

   Carnival Freedom ta un barco construi na 2007 y ta nabega bao bandera di Panama.  E aña aki el a wordo remodela.  Pa bo a subi e barco, e exigencia ta cu bo mester ta vacuna completo, y bin cu un test negativo di Covid-19 prome cu salida.

   Carnival Cruise no a bisa cuanto hende a bira malo abordo.  “Carnival Freedom ta siguiendo tur protocol y un cantidad chikito di hende abordo ta den isolacion debi na un test positivo di Covid.”

   “Nos protocolnan ta anticipa e posibilidad aki, y nos ta implementa nan manera ta necesario pa proteha e salud y seguridad di nos huesped y tripulantenan.  Esaki ta un viahe cu tur hende vacuna, y tur huesped a test prome cu e barco a sali,” e carta ta indica.

   Royal Caribbean di su banda a mustra cu tur pasahero mester ta full vacuna y bin cu un test negativo di Covid-19.  Y esnan abordo cu a test positivo, ta wordo isola y nan contacto cercano ta wordo poni den cuarentena y vigila pa 24 ora.

   Nan ta viahando cu varios capa di medida di salud y seguridad pa asina haci e viahenan crusero mas safe posible.
   Segun estadistica, viahamento riba barco crusero ta hopi popular cerca famianan y tambe cerca esnan di edad halto, y e riesgo di contagio ta relativamente halto riba un barco.  Muchanan chikito cu un sistema fuerte di inmunidad tin e fatalidad di mas abao y tambe ta esnan cu menos ta wordo hospitaliza door di Covid-19.

   Riba Dia di Pasco, na Florida a registra un promedio di 17.825 caso nobo di Covid-19.  Esaki ta un aumento di 818% compara cu ultimo dos simannan.  Hospitalizacion semanal a bira como 2.007, cu ta un subida di 44%.