ORANJESTAD (AAN): E relato di mas nobo di Oficina Central di Estadistica,
ta mustra cu e indice di “Cuminda & servicio di catering” a registra un subida di 1.3% na November 2021, despues di un subida di 0.3% na October 2021.
E indice di “Cuminda na cas” (1.8%) a registra un subida, unda 10 di e diesun indicenan di e gruponan di cuminda na cas a subi na November 2021.
E indice di “Fruta” a conoce e subida di mas grandi (8.2%) na November 2021. E indicenan di “Berdura” (6.5%), “Azeta y otro productonan traha di vet” (3.1%), “Batata, yuca y batata dushi” (2.9%), “Pisca y otro cuminda di lama” (1.7%) y “Carni” (0.9%) tambe a registra subida.
E indice di “Pan y otro productonan di grano” (-0.1%) a registra e unico caida na November 2021.
Den e ultimo diesdos lunanan e indice di “Cuminda & servicio di catering” a subi cu 3.4%. E indice di “Cuminda na cas” a conoce un subida di 3.8%. E indice di “Fruta” a subi cu 12.7%, e subida di mas grandi na November 2021. E indicenan di “Azeta y otro productonan traha di vet” (11.1%), “Carni” (5.8%), “Batata, yuca y batata dushi” (5.3%), “Berdura” (3.9%) y “Sucu, jam y otro tipo di cos dushi” (1.7%) tambe a registra subida.
E indice di “Cuminda pafo di cas” a subi cu 0.1% na November 2021 y a registra un subida di 2.3% den e ultimo diesdos (12) lunanan.
Na November 2021, “Cuminda na cas” y “Cuminda pafo di cas” como grupo, tabata tin un subida di prijs di 1.3% compara cu October 2021 y hunto tabata tin un influencia di 0.20 ppt riba e CPI, mientras cu e restante bienes y servicio hunto a experencia un subida di prijs di 0.5% y tabata tin un efecto di 0.41 ppt riba e Indice di Prijs di Consumo (CPI.)
