Partido AVP  y UPB di Bonaire ta fortifica nan relacion historico

ORANJESTAD (AAN): Partido AVP (Partido di Pueblo Arubano) ta sigui fortifica su lasonan historico cu Union Patriotiko Boneriano (UPB),

basa riba un vision comparti den partido cristian democrata, bon comun y un cooperacion mas fuerte entre Aruba y Boneiro den Reino Hulandes.

Despues di participacion di UPB na Congreso di AVP na Aruba e weekend cu a pasa, Prome Minister y ex-lider di AVP mr. Mike Eman a bishita cas di Union Patriotiko Boneriano na Boneiro. Durante e encuentro, e representantenan di ambos partido a intercambia idea tocante e relacion entre e dos isla, futuro di Reino y e manera cu Aruba y Boneiro por sigui traha hunto. Aki a topa e lider interino di UPB, Jolinda Craane, como tambe ex-lider di UPB, James Kroon y Burney El Hage, ex-diputado pa UPB.

AVP y UPB tin un relacion historico cu ta basa, entre otro, riba nan raiznan den ideologia cristian democrata. Ambos partido ta comparti e conviccion cu e islanan den Reino mester tin un rol activo den desaroyo di e relacionnan den Reino, no solamente como receptor, pero tambe como socio cu tin su propio balor agrega y contribucion pa ofrece.

Durante e bishita, Prome Minister Eman a ricibi e publicacion “Kompas pa Futuro”, cu ta contene e reflexionnan tocante futuro di Boneiro. E intercambio a brinda espacio tambe pa papia tocante e concepto di bon comun, un principio cu ta central den vision di AVP pa desaroyo economico y social.

Den e contexto aki, Prome Minister Eman a señala cu crecimento economico mester traduci den progreso cu ta yega den cada cas y cada bario. Aruba por tin un industria turistico fuerte y cu hotelnan di cinco strea, pero e ambicion mester ta pa tin tambe bario di cinco strea, un hospital di cinco strea y infrastructura di cinco strea, pa asina por sinti progreso directamente den calidad di bida di pueblo.

E bishita na Boneiro ta brinda oportunidad tambe pa sigui e dialogo cu diferente e diputadonan tocante idea concreto pa cooperacion entre ambos isla. AVP ta mira intercambio di conocemento, experiencia y vision como un instrumento importante pa fortalece e posicion di Aruba y Boneiro y pa crea mas oportunidad pa ambos pueblo.

Cu Wendrick Cicilia como lider nobo di AVP, kende tambe tin su lasonan familiar na Boneiro, partido AVP ta mira oportunidad pa sigui cultiva y profundisa e lasonan cu UPB y cu comunidad Boneriano.

Finalmente e ex-Lider di AVP como tambe Prome Minister Mike Eman a haya un buki regalo for di e lider interino di UPB, Jolinda Craane. Partido AVP ta aprecia e relacion cu Union Patriotiko Boneriano (UPB) y ta comprometi pa sigui construi riba e fundeshi cu ambos partido a forma durante hopi aña. Meta ta pa transforma e amistad historico den mas cooperacion concreto, semper cu bienestar di pueblo di Aruba y pueblo di Boneiro como punto central.