Parlamentario Gino Goeloe cu enfasis ta reitera:
ORANJESTAD (AAN)-- Parlamentario Gino Goeloe, den entrevista cu Matutino DIARIO, a menciona tambe cu un di e polisnan cu el a combersa cu ne, ora a reuni cu SPA, tin contacto cu Stichting Respaldo, y e sa cu tin un protocol entre KPA y Respaldo cu ta bay wordo firma.
Goeloe a indica cu e protocol aki mester haya curpa, defini ken ta haci kico, ken ta bin prome, ken ta bin despues, pero e Crisis Team ta e prome yama pa bin den casnan unda tin pashentnan psicotico, schizophrenico y cu adiccion.
“Den e protocol tin biaha bo ta yega hunto berdad, pero bo mester di un hende profesional pa atende e caso. Bo no por laga polis su so. E no ta e persona cu a studia pa e materia aki. No, e ta bay foi man. Pues, e Psikiatra cu su team mester ta eynan, cu e profesional den e materia, anto e ora ey bo tin polis pa si e situacion ta bay foi man, polis por tene, boei e persona y hibe Respaldo.
“Un carta a bay awe pa Stichting Respaldo pa bin den e Comision di Salud. Como Presidente di Fundacion Salud, mi ta yama un reunion cu Stichting Respaldo pa duna nos su feed back di con cierto cosnan no ta pasando y pa duna nos splicacion den Parlamento, pa wak con nos por yuda den e caso aki”, Parlamentario Gino Goeloe, di fraccion Futuro, a conclui.
