Prome Minister Eman y diputado Dennis Martinus ta sondea posibilidad di coopera den maneho di desperdicio

ORANJESTAD (AAN): Durante su bishita na Boneiro, Prome Minister Mike Eman a reuni diaranson mainta cu diputado Dennis Martinus (MPB) pa

dialoga riba cooperacion entre Aruba y Boneiro y diferente reto cu e islanan ta comparti. E encuentro ta forma parti di e serie di contacto cu Prome Minister Eman ta tene durante su estadia na Boneiro, cu enfasis riba fortalece e relacion entre e islanan y identifica e areanan concreto caminda cooperacion por wordo amplia.

Durante e encuentro, diputado Martinus a expresa su aprecio pa e bishita y a resalta e importancia di hermandad entre e islanan. E mandatario di Boneiro a indica cu e dialogo a inclui diferente posibilidad pa coopera y proyectonan cu por sigui wordo explora entre ambos isla.

Prome Minister Eman, na su turno, a expresa satisfaccion di por bishita Boneiro  despues di basta tempo. Awor por presencia e desaroyonan cu e isla a conoce. Eman a indica cu tanto Boneiro como Aruba ta comparti e reto di procura pa crecimento economico no keda solamente expresa den cifra, pero cu e por traduci tambe den bienestar concreto pa ciudadano.

“Nos ta comparti tambe pensamento riba con nos por ta mas exitoso den procura pa nos no tin unicamente crecimiento den cifra, pero crecimento tambe den e bienestar di nos ciudadanonan,” Prome Minister Eman a expresa.

E tema di prosperidad comparti ta uno cu Gobierno di Aruba ta poniendo enfasis riba dje. Segun Prome Minister Eman, e reto di haci cu desaroyo economico realmente yega cerca di ciudadano no ta limita na nos islanan, pero ta un desafio cu diferente pais ta enfrenta.

Den e contexto aki, Aruba ta impulsando dialogo riba e concepto di Common Good, buscando forma pa adapta e modelonan existente pa cu prosperidad no solamente wordo crea, pero tambe comparti y sinti den comunidad.

Otro punto importante durante e encuentro tabata maneho di desperdicio. Prome Minister Eman a papia riba posibilidad pa busca un vision comparti riba “waste management”, incluyendo forma pa transforma desperdicio den un producto final cu ta sostenibel pa medio ambiente y cu, na mes momento, por genera recurso economico.

Boneiro a expresa interes pa coopera hunto cu Aruba riba e asunto aki, mientras cu Hulanda tambe tin interes den e dialogo. Prome Minister Eman a indica cu despues di su mision na Boneiro, e dialogo lo continua pa Corsou.

Eman a enfatisa cu e concepto di bon comun ta specialmente importante pa e islanan, cu historicamente conoce periodo di escasez y menos prosperidad. Pa Gobierno di Aruba, ora tin crecimento y prosperidad, ta importante pa e beneficio di esaki por yega cerca di e pueblo.

E encuentro cu diputado Dennis Martinus ta forma parti di e esfuerso pa fortalece e lasonan entre Aruba y Boneiro y sigui construi cooperacion concreto riba e temanan cu ta di interes comparti pa ambos comunidad.