Participantenan di Conferencia LGBTQI+ a intercambia opinion tocante diversidad na trabao

Durante e di dos edicion di e conferencia

ORANJESTAD (AAN): Con ta crea un ambiente di trabao inclusivo y sigur, unda tur hende por ta nan mes, desaroya nan talento y wordo trata cu respet? E pregunta aki tabata central durante e di dos edicion di e conferencia LGBTQI+ na Aruba.

   Dia 22 y 23 di October 2026, e ministerionan Hulandes di Asunto Interno y Relacionnan den Reino (BZK) y di Educacion, Cultura y Ciencia (OCW) a organiza un conferencia tocante diversidad na  trabao, cu atencion special pa e posicion di personanan LGBTQI+. Cu e di dos edicion aki, e ministerionan a sigui riba e trabao inicia durante di e prome conferencia LGBTQI+, cu a tuma luga na Corsou na aña 2024.

   Un ambiente di trabao inclusivo, unda tur hende ta sinti nan mes sigur, respeta y aprecia, ta importante tanto pa empleadonan como pa organizacionnan. P'esey, e conferencia a reuni doñonan di empresa, profesionalnan di Recursonan Humano (HR), servicionan di salud laboral, sindicatonan, organizacionnan social, personanan LGBTQI+ y otro interesadonan for di e parti Caribense di Reino Hulandes. En total, mas cu 120 participante di Saba, Sint Maarten, Curaçao, Aruba y Bonaire a participa na e conferencia.

   Di encuentro pa intercambio di conocemento: E conferencia a cuminsa dia 22 di October cu un recepcion pa networking, unda participantenan por a topa otro y intercambia experiencia. Dia 23 di October a sigui un programa di contenido cu presentacionnan, panelnan di discusion y sesionnan interactivo.

   E topiconan central tabata entre otro con pa crea un ambiente di trabao sigur y inclusivo, desaroyo di politica di inclusion, e rol di lidernan y profesionalnan di HR, y e importancia di personanan cu ta presencia situacionnan di discriminacion pa yuda logra cambio den cultura di trabao.

   E dia a habri cu palabranan di apertura di minister Wyatt-Ras, Lisette Kuyper (hefe di departamento di Emancipacion na OCW) y representantenan di e organizacionnan Human Rights Caribbean y Workplace Pride. For di nan diferente perspectivanan, nan a enfatisa e importancia di duna atencion na diversidad y inclusion na  trabao.

   Compartiendo experiencia y buscando inspiracion: Ademas di e contribucionnan di apertura, a tuma luga dos panel di discusion. Den e prome panel, representantenan di organizacionnan LGBTQI+ di Saba, St. Maarten, Curaçao, Bonaire y Aruba a comparti nan experiencia. Asina tabatin espacio pa diferente perspectivanan y desafio cu ta presenta riba e islanan.

   E di dos panel a enfoca riba e rol di lidernan, profesionalnan di HR, personanan di confianza y sindicatonan den e creaccion di un ambiente di trabao sigur y inclusivo. Con nan por contribui na esaki y cua ta nan responsabilidad den e organizacionnan?

   Tambe a comparti ehempelnan inspirador di practica. Marriott Resort y Netwerk Regenboog di e sindicato Hulandes FNV a mustra, durante di dos presentacion di ehempelnan di bon practica, con politica di inclusion por wordo implementa den practica.

   Ademas, Workplace Pride a duna dos sesionnan interactivo. Participantenan a traha riba e desaroyo di politica di inclusion y a discuti con personanan cu presencia situacionnan por hunga un rol activo den e promocion di un cultura di trabao inclusivo.

   Hunto nos ta traha na ambiente di trabao inclusivo: E ministerionan Hulandes di BZK y OCW, hunto cu e Representacion di Hulanda na Aruba (VNO), e Representacion di Hulanda na Curaçao (VNW) y e Representacion di Hulanda na Sint Maarten (VNP) ta mira bek riba un conferencia exitoso y inspirador. E encuentro a ofrece participantenan e oportunidad pa intercambia conocemento y experiencia, establece contacto nobo y haya inspiracion pa sigui traha na nan mes organizacionnan riba e creacion di ambiente di trabao inclusivo y sigur.

   E organizadornan ta gradici tur e orador, panelistanan, organizacionnan y participantenan pa nan contribucionnan balioso.