"No ta aceptabel cu un persona cu ta traha tempo completo y no por cubri su necesidadnan basico"

Prome Minister Eman:

ORANJESTAD (AAN): Minister di Aruba, Mike Eman, a enfatisa cu e crecemento di e economia Arubano mester traduci den bienestar pa tur famia. Segun e Prome Minister, Aruba ta crece, e turismo ta fuerte y e cifranan di crecemento ta positivo, pero un pregunta mester keda central den tur decision di Gobierno: e crecemento aki ta yegando na tur hogar?

"Pa hopi famia, e contesta ainda ta no", Prome Minister Eman a bisa. Segun e Prome Minister, un trahado cu ta gana Afl. 2.100 pa luna, mientras cu e gastonan basico di su hogar ta yega na Afl. 2.600, ta cuminsa cada luna cu un deficit di Afl. 500. "No por ta aceptabel cu un persona cu ta traha tempo completo no por cubri su necesidadnan basico cu su salario."

E Prome Minister a señala cu pobresa no ta un cifra so. Ora un mayor mester traha dos trabou pa cubri e gastonan di su hogar, su yiunan ta haya menos atencion, barionan ta keda atras y hubentud no semper ta haya e sosten cu nan merece. Segun Prome Minister Eman, esaki ta un di e retonan mas grandi di Aruba: no solamente crecemento economico, sino con pa logra cu e crecemento ey ta traduci den bienestar pa e pueblo. P'esey Gobierno di AVP-Futuro a pone como un di su metanan principal pa conecta crecemento economico cu bienestar general, y un salario husto ta un parti esencial di esey.

Como ehempel, Prome Minister Eman a referi na e sector hotelero. Segun cifranan di AHATA, e tarifa promedio di un camber di hotel a aumenta cu alrededor di 12% den 2025 y ta supera US$300 pa anochi. Un trahado cu ta gana Afl. 2.100 pa luna ta gana mas o menos Afl. 95 pa dia di trabou, loke ta nifica cu e mester traha casi seis dia pa paga un solo anochi den e hotel caminda e ta traha. "E prosperidad cu nos economia ta genera mester refleha tambe den e calidad di bida di e hendenan cu diariamente ta contribui na e exito ey", e Prome Minister a bisa.

Prome Minister Eman a splica cu un aumento di salario minimo pa un solo biaha no ta suficiente pa garantisa poder di compra riba termino largo. P'esey Gobierno ta busca un sistema caminda salario minimo ta conecta cu e bestaansminimum, cu un mecanismo di ahustacion periodico cu ta tene cuenta cu e costo di bida. E obhetivo ta pa duna trahadonan mas siguridad financiero, mientras cu empresarionan por plania nan gastonan cu mas claridad y stabilidad.

E Prome Minister a subraya tambe cu e debate no ta limita na Aruba. Dia 3 di november, James Talarico, di Partido Democrata, a gana e eleccion pa Senado di Estados Unidos na Texas, como e prome Democrata cu a gana un eleccion pa Senado den e estado ey desde 1988. Durante su campaña, Talarico a pone enfasis riba costo di bida y riba e necesidad di aumenta e salario minimo federal, cu ainda ta na US$7,25 pa ora. Segun Prome Minister Eman, esaki ta mustra cu e preocupacion tocante poder di compra y salario husto ta existi tambe den economianan hopi mas grandi cu esun di Aruba.

Prome Minister Eman a expresa compronde pa e preocupacionnan di comerciante y empresario, cu ta forma un parti importante di e economia y ta duna trabou na miles di hende. E Prome Minister a reconoce cu un aumento di salario minimo tin implicacion pa empresanan, especialmente esunnan chikito, pero tambe cu e precio final di productonan ta depende di diferente factor, entre otro costo di transporte, importacion y operacion. Gobierno ta dispuesto pa busca solucion hunto, incluyendo posibilidad di ahustacion fiscal y sosten specifico pa empresanan chikito. Gobierno ta mantene su invitacion habri pa tur parti interesa sinta na mesa.

Finalmente, e Prome Minister a haci un apelacion na Gobierno, Parlamento, gremionan comercial y sindicatonan pa un debate serio, cu cifra, argumento y respet mutuo. "Atake personal y insulto no ta contribui na un solucion pa ningun trahado ni empresario", Prome Minister Eman a bisa. "Nos no mester mira e debate aki como un lucha entre trahado y empresario. Ambos ta esencial pa nos economia y ambos tin interes den un Aruba cu ta prospera."

Prome Minister Eman a conclui cu Aruba a demostra den momentonan dificil cu ora e pais traha hunto, e por supera retonan grandi. "Awor ta e momento pa garantisa cu e crecemento economico cu nos ta mira den e cifranan ta yega tambe na mesa di cada famia Arubano."