Director Interino di DOW Francis Gomes:
- Trabaonan di recap ta cuminza na Oranjestad y San Nicolas
ORANJESTAD (AAN)-- Den conferencia di prensa di Departamento di Obranan Publico (DOW), e Director Interino, señor Francis Gomes, a hiba palabra den presencia di Minister Rene Herde, y e Manager Director di Arubaanse Wegenbouw Matthijs Bijen. Gomes a duna informacion tocante e “gunning” di dos proyecto di asfalt.
El a splica cu despues cu nan a tene un destaho, dia 11 di September, awor DOW ta bay over na e “gunning” y esey ta e trabaonan di recap cu ta bay tuma lugar na Oranjestad y tambe na San Nicolas. “Esey ta e prome parti di e trabaonan di asfalt cu ta bay cuminza. Manera ta conoci nos a cuminza cu e trabaonan den Colony, ya nan ta andando. Esaki ta e siguiente destaho cu a tuma lugar cu ta bay ta e ‘gunning’ aworaki aki, y despues di esey nos ta bay tin mas proyecto di asfaltmento, y aworaki tin otro cu e destaho ta andando tambe, y dentro di poco nos ta continua cu e proceso pa asfaltmento di otro areanan di Aruba, tambe” señor Gomes a duna di conoce.
El a agrega cu esaki ta indica cu e trabaonan a cuminza y cu nan ta canando cu un progreso basta bon, y hopi tin di haber cu e fondonan cu a wordo aproba, ultimamente, di e Fondo di Inversion y cu tin recursonan extra pa por sigui cu e trabaonan di asfaltamento.
Señor Gomes a bisa cu hunto cu IA a haci opnamennan caba y a base di e lista ey nan ta cuminza cu esun cu ta mas urgente, y asina ta bay den fase conforme tin fondonan disponible, nan ta haci e destahonan den etapa.
“Despues di e gunning, normalmente nos ta sinta cu e contratista y nos ta wak e planning como cu ta acercando fin di aña y a base di esey yega na e miho solucion, pa evita crea stagnacion di trafico, innecesario. E intencion ta cu nos por cuminza y despues, ora tin e break di Pasco, nos ta wante por ta un tiki, y despues ta continua bek ora cu aña bolter” segun señor Gomes a indica.
