Parlamentarionan a haya recorido na tur tres planta di RWZI

ORANJESTAD (AAN): Recientemente DOW a invita tur e parlamentarionan pa presenta un rondleiding na tur 3 planta di purificacion y tambe na e incinerator na Parkietenbos.

   E mainta a cuminsa cu un presentacion duna pa Ing. Daryl Lue unda a splica di e plantanan cu nos tin na Aruba, con e plantanan ta funciona y cuanto inversion ta worde haci pa por tene e plantanan akinan operacional.

   Despues a sigui caminda pa RWZI Bubali unda cu e parlamentarionan por a mira e planta por completo. A bishita e laboratorio unda ta tuma samples di e awa diariamente.

   A sigui pa e recorido pa e Incinerator na Parkietenbos. Akinan tabata tin 2 experto di Reino Uni cu a bin inspecciona e incinerator y controla cu tur cos pa asina dentro di poco nos por cuminsa kima “slib” manera e veredicto recien di Huez a dicta.

   A sigui pa RWZI Parkietenbos unda cu por a mira e reparacionan cu ta andando pa pronto nos por habri RWZI Parkietenbos. Na final di mainta a bishita RWZI Zeewijk.

   Cu e bishita na e plantanan, e Parlamentarionan por a experiencia nan estado di mantencion y e urgencia pa yega na un solucion structural pa futuro.