Lucia Hoek, coordinador:
*Nos ta desea pa pueblo vota pa nos logra
ORANJESTAD (AAN) – Den un entrevista cu señora Lucia Hoek, Coordinador di Centro Kibrahacha, el a expresa cu nan ta desea di haya e sosten di pueblo, pa bay vota pa nan por gana un donacion di 25 mil Euro.
E aña aki Centro Kibrahacha a wordo nomina na dos caminda cu ta Oranje Fonds di Hulanda y tambe pa Long Table di Renaissance Wind Creek Aruba.
E donacion di Hulanda ta sumamente importante, Hoek a señala. P’esey nan ta haci un yamada na Aruba en general, specialmente esnan cu tin famia cu ta bishita e centro, y tur nan amistadnan, pa nan vota pa Centro Kibrahacha. Por subi e link di Kibrahacha pa bo por vota.
El a agrega cu importante ta cu den e votacion e persona hinca su email y semper e tin cu bay bek habri e email, y click riba dje pa e voto ta conta.
Lucia Hoek a indica cu den e Centro mes nan ta yuda nan clientenan pa vota, pasobra hopi di nan no sa précis con e proceso ta. Pero tambe tin yiunan y famianan di e miembronan cu ta bezig ta votando y esey ta haci nan hopi contento.
Hoek a señala cu nan a hopi gradici di a cay den e nominacion y awo ta bay traha duro pa por logra. Prome cu esey Centro Kibrahacha tin cu pasa via Curacao, bolbe haci presentacion di nan proyecto y si nan pasa na e di dos ronde, tin cu bay Hulanda pa e premio grandi.
