ORANJESTAD (AAN): Informacion for di e ciudad di Erie na estado di Pennsylvania, ta indica cu un turista kende tabata gusta mira tanto subida di solo,
y tambe bahada di solo tur atardi for di beachnan di Aruba, a fayece. Ta trata aki di Gary Haibach, kende Dialuna 20 di Mei a fayece cu edad di 82 aña.
Gary a casa cu e amor di su bida, esta Connie Fuhrman na Augustus 1967. E tabata bisa semper cu e prome cita cu e tabatin cu Connie, el a bise cu un dia e lo bay casa cune. Connie a conteste: “Hamas di bo bida”. Na Augustus awor nan lo a cumpli 57 aña casa.
E tabata un persona hopi religioso, pero tabata considera vakantie un momento pa famia diverti. Y e tabata gusta bin Aruba pa goza di lama, admira naturalesa, come oyster, y tur mainta purba mira subida di solo, y atardi na oriya di lama mira e bahada tambe.
Su entiero lo bay ta Diabierna awor na St. Luke Church na Erie, Pennsylvania. El a bay laga atras su dos yiu homber, y su nieto cu ta su wowo preto.
