Den cuadro di Dia di Himno y Bandera
ORANJESTAD (AAN): Hunto cu colega Ricky Hoek mi a participa na e carousel di informacion organisa pa Sint Aloysius School en conexion cu Dia di Himno y Bandera. Diferente persona y organisacion a participa na e carousel informativo aki y a tene charla y presentacion.
Como Parlamentario nos tambe a keda invita y mas cu claro a dicidi pa aporta. Nos charla a bay encuanto nos trabou, e proceso con nos a yega na nos Himno y Bandera y e protocol cu nos mester mantene ora ta trata e dos simbolonan nacional aki. Un tremendo dia, caminda e muchanan a participa cu hopi gana y atencion.
En conexion cu celebracion di Dia di Himno y Bandera, e alumnonan di Sint Aloysius School a haya e tarea pa traha hunto cu nan famia un obra di man 3D. Mi a keda impresiona pa loke tur a keda crea. Banda di e posibilidad di demostra nan creatividad familiar, e tarea aki a trece famianan hunto y pasa momentonan alegre hunto. Tremendo proyecto!
Na mi yegada na Sint Aloysius mi a haya e peticion pa forma parti di e cuerpo di hurado pa asina nan por saca un ganador di klas 1-3 y un ganador di klas 4-6. Un trabou sumamente dificil mirando tur e bunita obranan. Mi kier a felicita Sint Aloysius School cu e bunita expo aki y mas cu claro tambe un pabien na tur e mentenan creativo cu a traha riba e obranan. Petje af.
Dado momento durante e mainta special aki, e mucha y maestronan, a haya bishita di nos Minister President Evelyn Wever-Croes y Minister Endy Croes. Nan a keda masha contento mes.
Un pabien un bes mas na e comision organisado di Sint Aloysius School pa e carousel informativo y e tremendo exposicion. Boso ta campeon! Masha danki pa e invitacion y pa laga nos forma parti di bunita mainta aki.
https://diario.aw/categories/noticia/general/parlamentario-tromp-lee-ta-felicita-sint-aloysius-school-cu-nan-carousel-informativo#sigProIdd1ffdc9ed6
