Fiscal a duna ordo pa confisca BMW motorcycle
ORANJESTAD (AAN): E tabata un molester enorme den fin di siman cu a pasa! Tanto motorcycle, y tambe autonan cu ta kere cu caminda publico di Aruba ta tereno pa imita ‘Fast & Furious’ door di revv motornan, laga wielnan canta, kima rubber riba asfalt, y keda draai rond di rotonde of na cruzadanan, ta burn-out wiel y keda drift.
Tabata Diabierna anochi banda di 9:00 pm, cu yamadanan a cuminza drenta na Central di Polis di ciudadanonan kehando di boroto insoportable den area di e cruzada banda di Plaza Juan Pablo Duarte, cerca di e cruzada di Van Leeuwenhoekstraat y Caya Ing. Roland Lacle.
Ora cu Polis di Playa a yega cerca di e negoshi di Baby Back Grill cu ta na e cruzada mas pazuid cerca di Caya Betico Croes, nan a mira un homber bisti na preto den manga largo ta burn-out taira e momento ey cu boroto inmenso banda di e negoshi di cuminda.
Polisnan a bay staciona nan vehiculo na e cruzada banda di Plaza Juan Pablo Duarte, y a duna e manehador di e motorcycle un señal pa stop. Pero e motociclista no a worry cu nan ordo, y a djis sigui burn-out wiel y drift despues.
E momento ey tabatin hopi hende cerca di e area, y e tabata blokeando full e caretera, obstaculizando e movimento liber di trafico. Despues el a move y bay cu velocidad masha duro mes ta core bay pabao den Van Leeuwenhoekstraat ta lanta tur hende y baby for di soño den e bario.
Pa su propio seguridad, e agentenan a dicidi pa no bay su tras. Polisnan a bandona e area pasobra trankilidad a regresa.
Dado momento e unidad Policial poco despues a bolbe pasa na e cruzada aki y a bin nota cu e shon y e motorcycle ta bek, y e vehiculo ta staciona. Polis a mira cu un homber cu color di cuero cla, bisti na maron, cu un helm preto ta bayendo pa sinta bek riba e motorcycle.
Mesora Polis a bolbe duna e manehador un señal pa stop, pero el a bolbe neglisha e orden legal aki, a start su motorcycle y a bandona e area mesora, e biaha aki rumbo pa Adriaan Lacle Boulevard bay zuid. Polis a keda mira for di un distancia, y a duna informacion via nan Tetra Radio di loke ta pasando, y na e cruzada cu Lloyd G. Smith Boulevard nan a perde for di bista.
A resulta cu unidadnan di Polis riba Motorcycle a capta e mensahe, y nan a djis stop un rato y scucha cu nan oreanan, y por a tende claramente ta unda e motorcycle ey ta coriendo debi na e boroto cu e ta causa.
Polisnan riba Brommer (Motorunit) a tope y finalmente nan a logra pare na altura di Fisherman Hut riba Lloyd G. Smith Boulevard. E unidad di Polis di Playa a bay eynan, y a bin nota cu ta trata di e mesun motorcycle cu a causa caos den Van Leeuwenhoekstraat.
Ta trata di un motorcycle preto/blauw di marca BMW modelo S100R (mas o menos similar cu e potret aki).
Como cu Ministerio Publico a duna instruccion, cu tur auto of brommer cu wordo gara riba caya ta haciendo burn-out of drift lo wordo confisca automaticamente (e doño lo perde su vehiculo pa semper), nan a dicidi pone nan Hefe di Servicio na altura.
Hefe di Servicio na su turno a drenta den contacto cu Fiscal di Ministerio Publico, pa splica kico a pasa y cu nan a gara un motorcycle. Fiscal a duna ordo mesora, cu e vehiculo ey ta wordo confisca.
Mesora nan a notifica e manehador, cu el a caba di perde su motorcycle. Takelwagen a transporta e motorcycle valioso aki pa wordo warda. E manehador mes a haya un multa debi cu el a viola Articulo 2 di Ley di Trafico. Na final a pone Central di Polis na altura.
DIARIO a compronde cu den fin di siman aki, ta hopi habitante a keha di molester causa specialmente den oranan di anochi. Molester di motorcycle y tambe di autonan cu ta keda revv motor, y drift riba caya treciendo bida di hopi hende na peligro. Keto bay e regla tey na vigor, esta cu si Polis garabo, lo bo perde bo auto pa semper.
