Parlamentario Molina lo papia cu minister y DIP pa wak con por yuda Heintje Ras logra su Mega Museo

ORANJESTAD (AAN) — Parlamentario di fraccion di MEP, Alvin Molina, tabata presente den e conferencia di prensa yama pa Heintje Ras,

despues di a conclui cu e cien dianan cu el a keda den e mina di fosfat, cu e intencion di kibra e “Guinness World Records” y logra su meta di traha un Mega Museo Nacional” cu e antiguedadnan cu e tin acumula den su cas (riba seis mil pieza).

            E parlamentario a sigui di cerca e hazaña di Ras, y el a indica cu e no tabata tin otro manera pa logra, pa yega na e Mega Museo. Den entrevista cu DIARIO, Molina a señala cu Heintje hunto cu su grupo, a dicidi di organiza e hazaña aki como un fundraising, pa e cumpra su tereno tras di e edificio y asina lanta su museo.

            Molina a comenta cu si mira e resultado financiero di e fundraising, Ras mes a bisa cu e no ta loke el a premira, pero el a spera mucho mas cu esaki. Y cu locual e tin e mes a bisa cu no por haci mucho cos.

            E parlamentario a expresa cu, di otro banda, si wak e otro logronan cu e tin, manera keda 100 dia den e mina di fosfat, ta algo bunita tambe pa su mes, pa su team y pa Aruba tambe, cu e no a laga su soño bay, pasobra e ta bay keda lucha pa logra e Mega Museo.

            Parlamentario Molina a subraya cu no ta di awo, pero for di momento cu Heintje a cuminza cu su hazaña, e tabata papiando cu diferente mandatario y bisa nan kico nan ta pensa cu si por haci, pasobra financieramente, Aruba ta den un situacion hopi precario, pero e ta kere cu lo tin otro manera cu gobierno por yuda, y esey mester sondea awo hunto cu e minister concerni y DIP, pa wak ki tereno of edificio e lo por haya na su disposicion, pa por instala e museo aki.

            Molina mes ta haya importante un proyecto asina, pasobra e ta algo di Aruba su cultura, y ta tambe pa e generacionnan cu ta bin despues, cu lo por goza di mas di seis mil artefacto cu e tin, pa keda preserva.