ORANJESTAD (AAN): Minister di Husticia, Rocco Tjon a referi den conferencia di prensa na e situacion di e departamento di Slachtofferhulp Aruba,
mirando cu algun miembro di Parlamento a haci un peticion pa duna na e departamento aki mas atencion.
Minister Tjon a splica cu Slachtofferhulp cu hopi aña atras, e departamento aki tabata resorta bao di Directie Sociale Zaken. Algun aña pasa a tuma e decision di resort'e bao di Cuerpo Policial.
Mirando e preocupacion cu tin den e veld, a yega tempo pa bay explora e posibilidad pa yega na un departamento como tal cu por brinda e asistencia externo na victimanan, na famianan. Pero tambe ta wak un rol hopi importante internamente, e mandatario a enfatisa.
"Si nos wak full e cadena, e cadena hudicial, pero e cadena social tambe, mi ta kere cu Slachtofferhulp por brinda asistencia y yudansa tambe na trahadornan mes den e diferente departamentonan aki", a bisa.
Segun e mandatario, ya caba tin diferente documento na departamento di Recurso Humano cu ta splica kico lo ta e mihor forma pa duna contenido na un departamento asina. Analisisnan lo mester bay wordo haci pa wak kico e impacto financiero lo ta.
Un departamento asina tin un balor agrega, sigur cu si, Minister Tjon a expresa. "Mi lo sostene tur idea y peticionnan cu bin pa loke ta logra cristalisa esaki".
