ORANJESTAD (AAN): Recientemente den un esfera ameno Minister di deporte Endy Croes a reuni cu ekipo di maneho di IBiSA.
Presente ne ocasion tabata sr. Edgar Erasmus, sr. Wladimir Wolff y sr. Christiaan Goedhart kende nan a duna un presentacion extenso y detaya di e trabounan cu a wordo haci riba peticion y vision di e mandatario.
Tambe a elabora riba e plan pa cu deporte. Un di e proyectonan cu a bin pa dilanti ta; Weganan Escolar ‘We’ y pa final di luna di januari IBiSA lo presenta e presupuesto cu ta acopla n'e programa.
E idea di e Weganan Escolar ta pa mas y mas nos muchanan na scol por aprecia e ‘feeling’ cu deporte ta brindando nan y kita nos muchanan di caya.
‘WE’ ta un concepto moderno y ful nobo cu un mix nobo di competencia entre muchanan di 4-6de klas pero lo inclui alabes un hala di kleuter den algun di e competencianan. ‘WE’ probablemente lo tuma luga den juni di aña 2022.
Ta trata aki di competencianan entre scolnan den diferente deporte den seis y/of ocho diferente disciplina, e final lo tuma luga den luna di juni entre e miho hungadonan den un siman olimpico.
E Weganan Escolar Olimpico lo tin un apertura y clausura bunita y grandi cu premionan atractivo y un programa yamativo pe publico tambe bin sostene y apoya nos atletanan di scol.
Durante e reunion a trata tambe diferente tema interno manera posicion di empleadonan. E tabata un reunion hopi amplio, hopi positivo y lucrativo’ e mandatario a finalisa.
