Parlamentario Evelyn Wever-Croes ta orguyoso di e proyecto Leerorkest

Parlamentario Evelyn Wever- Croes, tabata presente den un presentacion di Leerorkest na Renaissance Convention Center, recientemente.

  E dama parlamentario a splica cu esaki ta un proyecto cu a cuminza den temponan di Gobiernonan di MEP, p’asina laga nos muchanan ser conoci cu instrumentonan musical special, na un edad hopi jong.

E dia aki tabata tin klasnan 3,4,5 y 6 di diferente scol na unda leerorsket ta wordo practica, Wever-Croes a bisa.

   El a subraya cu e tabata un presentacion masha bunita mes, cu instrumentnan hopi straño manera chelo, viool, cosnan cu e muchanan no ta topa tur dia como instrument, pero cu aki na leerorkest si ta posible.

“Mi ta hopi contento di mira con leerorkes ta sigui crece, y awo Traimerdia tambe ta participa. Mi ta contento di mira cu Gobierno a continua cu ne. Mi kier felicita un persona special, Juliette van Romondt, cu ta e motor di esaki for di cuminzamento y cu ta mustra determinacion y curashi y con e ta touch bida di nos muchanan. Cada mucha cu tin un lugar pa musica den su curazon, ta bay logra cosnan grandi. Loke nos kier ta inspira nos muchanan mas tanto posible. Esaki ta un bunita proyecto, un pabien na Leerorkest, na Juliette van Romondt, y danki tambe na tur e maestronan y scolnan cu ta duna di nan parti pa e muchanan por siña e instrumentnan y na e muchanan: ‘wow! Tremendo presentacion. Mi ta orguyoso di bosonan”, Parlamentario Evelyn Wever-Croes a expresa.