Minister Rene Herdé
ORANJESTAD (AAN): Gobierno di Aruba conhuntamente cu Fundacion Cas pa Comunidad Arubano (FCCA) a inicia un programa di mantencion di casnan den Village na San Nicolas. Minister Rene Herdé a duna di conoce cu no ta solamente e mantencion di e casnan, si no Gobierno di Aruba ta sigui comprometi pa mehora limpiesa, mantencion y calidad di bida riba nos isla. Por medio di diferente iniciativa y esfuerso continuo, e departamentonan concerni ta trahando diariamente pa mantene nos comunidad y luganan publico den bon estado.
Sinembargo, gobierno ta enfatisa cu esaki no ta deber di gobierno solamente y sigur no por wordo logra door di ayudo di gobierno so. E bienestar y limpiesa di Aruba ta un responsabilidad comparti entre gobierno, sector priva y cada ciudadano.
Den e ultimo simannan, diferente accion di limpiesa y renobacion den varios bario y area publico a wordo realisa. E esfuerso aki lo continua, pero pa logra resultado duradero, ta importante cu tur hende pone su granito di arena.
Gobierno ta haci un yamada na comunidad pa colabora, evita tira sushi ilegalmente y contribui activamente pa mantene nos isla limpi y placentero pa biba, traha y bishita.
Hunto nos por logra un pais mas limpi, mas bunita y cu nos tur por ta mas orguyoso di dje. Un Aruba limpi ta deber di nos tur!
