Papa Leo oficialmente a declara Dr. Jose Gregorio Hernández como santo

CIUDAD VATICANO: Papa Leo XIV a canoniza riba Diadomingo durante un ceremonia na Plaza San Pedro,

dilanti di miles di fiel presente, e venezolanonan Dr. Jose Gregorio Hernández (medico laico) y Carmen Rendiles (religioso) cu nan ta bira e prome santonan di Venezuela.  Cinco otro beato mas a wordo canoniza tambe

   Den e ceremonia manera ta tradicional, Papa a lesa e biografia di tur beato, y a pidi pa inscribi nan nomber den e buki di santonan.  Despues di a haci e declaracion na latin di e canonizacion, por a tende un aplauso fuerte na Plaza San Pedro.

   Durante e misa di canonizacion, Papa Leo a bisa cu “e biennan material, cultural, cientifico, y artistico” ta perde sentido si acaso no tin fe, y a elabora riba e testimonio di e santonan nobo, cu tabata capaz di “mantene cendi e lampi di fe”.

   “Fe, compara cu bienes material grandi, cultural, cientifico, y artistico ta sobresali, no djis pasobra e bienes aki ta despreciabel, sino pasobra sin fe nan ta perde e sentido,” e Papa a bisa durante su predicashi.

   “Awe dilanti nos tin siete testigo, e santonan nobo, y cu e gracia di Dios a mantene cendi e lampi di fe, y mas aun, nan mes tabata e lampi capaz di difundi e luz di Cristo,” el a añadi,.

   Ademas di Dr. Jose Gregorio Hernández (Venezuela) y Carmen Rendiles (Venezuela), a canoniza tambe Ignacio Choukrallah Maloyan (Arzobispo Catolico Armenio di Mardin, Turkia), Peter To Rot (Laico di Papua New Guinea), Vincenza Maria Poloni (Fundador di Instituto di Souernan di Misericornia di Verona, Italia), Maria Troncatti (Congregacion di Yiunan di Maria Auxiliardora di Italia), y tambe Bartologo Longo (Laico di Italia).

   Den su discurso, Papa Leo a subraya cu e recien proclama santonan aki no ta “heroe” ni “campeon di un sorto ideal, pero nan ta homber y muhenan autentico”.

   Refiriendo su mes specificamente di e santonan nobo, Leo XIV a cualifica Dr. Jose Gregorio Hernández como un ‘benefactor di humanidad cu un curazon yena cu debocion” y na Carmen Rendiles como un ‘fundadora carismatico kende a dedica su bida na educacion y servicio di otronan”.

   “E amigonan aki fiel di Cristo, ta martirnan pa nan fe, manera obispo Ignacio Choukrallah Maloyan, y e katekista Pedro To Rot, nan ta evangelizador- y misioneronan manera soeur Maria Troncatti, nan ta fundadornan carismatico, mescos soeur Vicenta Maria Poloni, y soeur Carmen Rendiles Martinez, nan ta esnan cu ta haci bon pa humanidad y cu curazon yena cu debocion, mescos cu Bartolo Longo y Dr. Jose Gregorio Hernández Cisneros,” el a bisa.

   El a añadi: “Cu nan intercesion ta yuda nos den pruebanan y nan ehemplo inspira nos den e vocacion comun na santidad.”

   Tambe Papa Leo XIV a recorda riba e importancia di oracion, compara esaki cu e rosea cu ta mantene e curpa na bida, y a adverti riba tentacionnan cu ta pone e fe na prueba.

   Na Venezuela ta miles di fiel tabata di marduga riba caya, den Misa, y mirando via pantaya grandi loke ta pasando na Roma.  Tur hende na oracion, y cu alegria ora cu vuurwerk a start tambe.