Lamper a pone coriente bay na diferente lugar rond Aruba

Diasabra tecniconan di Elmar haciendo reparacion tur rond

• Mal tempo a keda pasa henter weekend riba e isla 

ORANJESTAD (AAN): E anochi di Diabierna pa Diasabra, atmosfera tabata basta instabil cu humedad extra, cu a genera hopi nubia diki, cu tabata trece awacero hunto cu lamper y strena na abundancia.

   E maltempo aki a cuminza move for di Zuidoost di Aruba, y a sigui yega y na comienzo a azota areanan Pariba di Brug cu yobida fuerte y tambe lamper cu strena.

   Debi cu lampernan tabata corta constantemente tras di otro, y algun tabata corta y bin abao na tera, esaki dado momento a ocasiona cu coriente a bay ora cu fusenan di voltahe halto ta bula, debi cu lamper a dal riba grid di coriente.

   Lamper a corta y dal den sistema di coriente banda di 1:19 am, y esaki a benta afo areanan di Hooiberg y Sero Biento.

   Tres minuut despues, lamper a dal den area panort di rotonde cerca di Misa di Noord, pues pa 1:21 am coriente a bay den vecindario di Centro di Bario Noord.

   Nuebe minuut despues, esta pa 1:30 am lamper a dal y benta coriente abao na Maria Maai, Warawara, Jan Flemming, y Macuarima.

   Diez minuut despues, lamper a dal y pa 1:40 am, coriente a bay na Shaba.  Areanan di Tanki Leendert tambe a perde coriente ora cu lamper a dal net pazuid di Stern GM.

   Tres minuut despues, coriente a bay pa 1:43 am na area di Palm Beach y Washington.

   Tecniconan di NV Elmar tabata riba caya ta iluminando palonan di luz pa purba mira unda tin fuse cu a bula.  Asina ya pa 2:39 am, nan a pone cierto area di Sero Biento haya coriente bek.

    Pa 2:59 am, nan a logra duna coriente bek den e area di Tanki Leendert. Pa 3:13 am nan a duna coriente bek na Washington.

   Mainta atrobe cu mas lamper: Ora cu mainta a habri, lampernan a cuminza corta atrobe den varios bario.  Banda di 6:54 am, Elmar a nota cu hopi bario ta sin coriente debi na lamper cu ta cortando atrobe.  Barionan manera Mahuma, Kamay, Jucuri, Papilon, Savaneta, Kadushi Largo, Soledad, Sabana Grandi, Tanki Leendert, Moko, Jan Flemming, Jara, Rooi Bosal, Barcadera Generaal Majoor de Bruynewijk, y Bubali.

   Pa 6:58 am e tecniconan a yega Kamay y a bin haya monton di fuse bula.  Pues a cuminza drecha uno pa uno.

   Un otro crew den Santa Cruz, pa 7:03 am a logra duna coriente bek den e bario ey.  Mientras tanto pa 7:24 am, a duna coriente bek na Kamay.

   Trabao a sigui, y pa 8:25 am a duna coriente bek den e area di Moko.  Pa 8:40 am, e tecniconan a yega Washington unda a bin descubri cu tin algo mas grandi cu a kima den un Transformatorhuis.  Pues nan tin di bay busca e pieza aki for di deposito pa asina haci reparacion.

   Pa 9:38 am e tecniconan a yega Tanki Leendert pa drecha fusenan y reestablece e suministro di coriente.  Pa 9:47 am e tecniconan a yega Mahuma pa pone fusenan bek y duna coriente un biaha mas, como 10 minuut despues.  Pa 9:57 am a duna coriente bek (ademas di Mahuma), tambe na area di Papilon y Jucuri.

   Pa 10:10 am, tecniconan a yega Savaneta pa mira kico a pasa, y a bin descubri cu lamper aki a dal direct den un transformer di coriente.  Pues tin di haci reparacion mas grandi.

   Un otro crew di Elmar pa 10:31 am a yega Barcadera pa drecha e grid di coriente, y esaki a dura 60 minuut pa keda cla. Pues pa 11:28 am nan a duna coriente bek na area di Barcadera.

   Pa 12:03 pm, tecniconan a yega cu e pieza, y a cuminza drecha e ekipo di voltahe halto den e transformatorhuis na Washington.  E mesun momento ey, nan a keda cla na Savaneta y e bario a haya coriente bek.

  Pero pa 12:24 pm, coriente a bolbe bay na Savaneta, y tecniconan ta bolbe bay pa busca fuente di e storing.  Pa 2:16 pm nan a drecha e grid na Savaneta, y e distrito a haya coriente bek.

   Pa 1:50 pm e tecniconan a bay bek na Macuarima pa haci reparacion atrobe.

   Pa 2:17 pm, tecniconan a bay pa Bubali pa ehecuta un trabao di reparacion, cu lo bay dura mas di 2 ora pa wordo haci.  Mientras tanto trabao keto bay tabata andando na Macuarima.

   Pa 3:31 pm a reestablece coriente na Macuarima.  E momento ey ainda tecniconan tabata haciendo trabou di reparacion na Bubali ainda pa duna coriente bek.

   Pa 4:18 pm, tecniconan di Elmar a descubri un problema serio cu wayanan di coriente di voltahe halto na Matividiri, y esaki ta rekeri un trabao urgente di reparacion, cu lo dura mas di dos ora y mey.  Finalmente te 6:49 pm, a keda cla cu reparacion y Matividiri a haya coriente bek.