Pader Boks a fayece lagando hopi bunita memoria cerca pueblo di Aruba

ORANJESTAD (AAN): Un di e pastoornan cu tabata hopi keri den pueblo di Aruba, y cu tabata wordo admira pa su forma di duna les, di duna conseho, y con e ta maneha su parokianan, esta Pader Boks, a fayece Diabierna siman pasa.

   Dominicaan Antoon Boks a fayece cu 81 aña di edad na Hulanda.

   Pader Boks a nace dia 13 di Augustus 1940 na Schiedam (Hulanda), y el a haci su profesion como dominicaan dia 18 September 1960, y despues dia 11 Juli 1966 a bira Pastoor.

   Pa un tempo cortico el a fungi como misionario na Puerto Rico unda el a siña papia bon Spaño.  Despues pa hopi tempo na Antiyas Hulandes, incluyendo Aruba!

   El a yega Aruba na Januari 1972, y aki el a cuminza siña Papiamento, y el a bisa cu esey a bay facil.

   E tabata conoci pa su perfecto dominio di idioma Papiamento.  E tabata papia esaki asina bon, cu bo tabata hasta kere ta un yiu di tera e ta naci aki.  E mes a bisa cu casi ningun hende tabata sa cu e ta Hulndes, pasobra na Puerto Rico el a siña cu ora e sali di cas, semper tin di papia Spaño.  Tabatin un biaha cu un persona a dune compliment, cu e ta papia asina bon Hulandes...

   Na Aruba el a cuminza duna les di Godsdienst na MAVO, y tambe HAVO y VWO na Colegio Arubano.  Mainta e tabata docente, y merdia e ta traha na Parokia.  Esaki tabata nifica por lo menos 65 entiero pa aña, y tambe e preparacion pa Prome Comunion y Confirmacion na tres scol di cual cada uno tin por lo menos 2 klas.

   El a keda 7 aña na Aruba, y dado momento tabatin problema na Bonaire, y aki el a ofrece pa bay aya, pero a stipula cu e lo haci esey pa 7 aña, pasobra e acostumbrado 2 of 3 aña di fungi como pastoor, lo no yudabo siña conoce hendenan.

   Asina el a yega na Kralendijk unda el a traha 7 aña.  Despues di 3 aña ya caba nan a pidi’e si e por bay pa Oranjestad na Aruba debi na un problema.  E tempo ey ta Pastoor Wijbe Fransen a bay Oranjestad.

   Na Bonaire e tabata no solamente Pastoor y docente di Godsdienst, sino tambe a yuda cu e opleiding di pastoraal medewerker di Aruba, Curacao y Bonaire.  Esey nifica cu tin biaha Diahuebs merdia ta viaha pa Curacao pa duna les na Universidad for di 6 pm te cu 10 pm, y despues bay bek Aeropuerto pa regresa Bonaire.

   Despues di 7 aña, Pader Boks a bandona Bonaire y a bay bira Pastoor di Parokia Santa Anna na Noord.  Aki el a sigui traha duro, pasobra e envolvimento di 8.000 parokiano di Noord tabata grandi.  Tur fin di siman como 1.400 persona ta bay na un di e cuatro celebracion di Eucaristia, tabatin por lo menos 120 bautismo, como 180 mucha hayando prome comunion, y entre 80 pa 120 cu ta wordo confirma.  Mientras tanto Pader Boks a sigui duna les.

   Na aña 1998, Pader Boks a bira vicario, y mester a bay duna les na e dominicanonan na Antiyas.  Na 1999 el a bandona Parokia di Noord y a bay Curacao.

   Na aña 2002 Pader Boks a bay St. Maarten pa 3 luna pa investiga y soluciona un problema.  A resulta cu un Pastoor Filipino a fia hopi placa y a bay laga un debe grandi atras.  Pakico esey a socede, no tabata mucho cla.

   A dura 8 luna pa e Parokia por a paga e debe na banco, y esaki a bin debi cu e Parokianonan tabata coopera bastante.  El a splica cu un biaha riba un Dialuna, e tabatin mester di 6.000 Florin pa yuda un famia.  El a bisa esnan den Misa cu lo bay tin un 2ndo collect pa yuda e famia.  E placa cu el a ricibi eynan tabata mucho mas cu tabatin mester.

   Na Januari 2003 e dominicanonan na Huissen (Hulanda) a indica na Pader Boks cu nan kier pa e bin yuda nan aya.  Y asina na 2009 el a bay bek Hulanda.

   Desde cu el a haya un accident y a cay na 2016, su salud a cuminza bay atras, pero tur caminda cu tabata posible el a sigui haci su trabao.  El a fayece na Rijnstaeteziekenhuis na Arnhem.

   Su entiero ya a tuma lugar Diahuebs 21 di October na Hulanda.