“Ora nos ta haya cualkier malesa, nos ta sinti nos mes un poco incomodo. Y ta puntra nos mes con esaki por ta posibel. Y si ta un malesa grandi, un persona por reacciona ‘Pakico ami’?
No ta momento pa yora of rabia, pero pa reflexiona.
Ami tambe a y ta hiba un forma di biba saludabel; no come carni, come fruta y berdura, bebe juice fresco, haci ehercicio, purba biba cu menos stress.”
Sra. Nilda Koolman, un pacient recien cu cancer di pecho ta comparti e momentonan cu el a ricibi e noticia y con e ta bayendo cu e trayecto dificil aki. “Na December 2020 mi a sinti algo duro manera un pipita na mi pecho robes. Pensando cu ta algo pasahero, mi no a preocupa mucho. Pero dianan ta pasa y mi ta sinti e pipita mescos. Mi a haci un cita cu mi dokter di cas cu a constata cu enberdad tin algo cu no ta parce bon. Mi a bay haci mamografia y ecografia. Y un par di dia despues mi ta haya yamada pa acudi na Mammapoli. Despues un cita cu ciruhano kende ta manda mi haci un biopsia pa saca muestra pa investigacion. E resultado ta indica cu mi tin un tumor canceroso.
Sin duda cu mi a spanta, a scucha cu calmo tur loke e dokter ta bisa y con ta bay atende, pero ora mi a yega cas ta parce cu mundo a para keto. Con pa haci awo? Na prome luga bo ta pensa ‘Cuanto tempo mas’?, ‘Con pa sigui’?
Y si bo a mira varios hende pasa den e proceso aki, manera mi propio mama den feliz memoria, lo bo halsa bo bista na laira y pidi pa sanacion.
Despues a sigui consulta cerca oncologo y a haya splicacion di e tratamento cu lo sigui.
Un tratamento cu lo cuminsa cu dieseis sesion di kimoterapia. Sigur cu mi a haya miedo despues di a tende den pasado cu hende por bira hopi malo di e tratamento of cu nan no ta soporte.
Pero mi a pone tur confiansa den Señor cu a crea nos, e lo tin e ultimo palabra. E ta esun cu ta permiti pa nos dokternan y enfermeronan haci uzo di ciencia pa yuda tur patient. Y mi mester pone confiansa den mi mes cu lo mi triunfa.
Ta manera un gracia di Señor pa bo reflexiona tocante bo bida. Bida no ta tur dia alegria so, tin dianan menos agradabel cu nos mester enfrenta pa busca solucion of pa conforma cu loke nos tin y loke ta bay bin.
Durante e periodo di kimoterapia for di Maart te cu September ultimo mi a haya contratiempo tambe, manera alergia di cuero. Atrobe danki na nos mediconan specialista y enfermeranan mi a surpasa e obstaculonan. Sin duda cu e kimoterapia tin su efectonan secundario manera problema cu sanger. Di otro banda mi tin un respet y aprecio grandi pa nos enfermeranan cu ta traha na e seccion di Oncologia aki na Aruba. Nan ta semper atento y ta traha cu hopi dedicacion. No ta facil pasobra cada patient fuera di su malesa, tin su propio preocupacionnan. Asina mes tabata tin momentonan di alegria cu e pashentnan y e enfermeranan a comparti cu otro.
Mi a caba di haci un operacion y ta wardando e resultado pa wak con ta sigui atende e tratamento. Tambe na Mammapoli e trato ta profesional cu hopi dedicacion.
Pa mi ta hopi importante cu mi por conta cu sosten di mi famia, bisiña y amistadnan den e trayecto dificil aki. Y mi ta spera cu esey ta conta tambe pa tur otro hende cu ta hayando un tratamento pa cualkier enfermedad.
Lo mi kier conseha tur hende muhe pa haci bo chekeo di pecho regularmente y no tene miedo pa comparti bo sentimentonan y experiencia cu otronan. Come, bebe saludabel y haci ehercicio manera canamento. Si bo tin un of mas hobby, sigui cu nan. No ta facil, pero yena bo dianan cu positivismo, alegria y oracion. Disfruta di bida den tur aspecto. Tur esakinan por ta un terapia pa surpasa e periodo di tratamento y despues. Corda cu nunca bo ta bo so, pues animo!
Semper mi a apoya e bunita trabou di Mary Joan Foundation y awo mi ta nan cliente pa haya ayudo y sostene otronan. Ban sostene tur persona cu tin un of otro enfermedad y apoya instancianan cu ta yuda conscientisa comunidad.”
