ORANJESTAD (AAN) -- Banda di covid-19, Sharline Koolman, Hefe di Seccion di Malesanan Contagioso (DBZ) di Departamento di Salud Publico (DVG), sa cu tin mas malesa respiratorio cu a cuminza lanta caba na Aruba.
El a splica cu “banda di esaki hospital a menciona tambe cu nan a mira un crecemento no grandi, pero si di mas virus cu ta aparece, mayoria di biaha den fin di aña, pa motibo cu otro paisnan a drenta den e periodo, pero na Aruba tambe a cuminza yobe; y bo ta mira e ora ey cu otro malesanan respiratorio tambe ta lanta” el a reitera.
Pa cu esaki, Koolman ta keda recorda e aspecto di higiene, pasobra esaki ta importante pa covid-19 pero tambe pa tur otro malesa respiratorio. El a agrega cu cerca muchanan tambe por mira cu esaki ta mas remarcable. “Nos ta hayando mas caso y manera mi a yega di menciona algun biaha, nos ta haya tambe muchanan cu tin mas cu un virus. Pues, nan tin por ehemplo covid-19 pero nan tin adenovirus, e virus di griep, influenza, y diferente virus ta circulando aworaki. Basa riba esey, manera tur aña nos tin e griep vaccine. Nos no kier bruha dos cos den otro. Nos kier ta hopi duidelijk cu nos tin e covid vaccine, cu ta disponible na Departamento di Salud Publico, pero tambe e griep vaccine cu a yega aña pasa, y cu ta mescos cu ‘influenza vaccine’. Cada un ta pa un otro tipo di virus”, Sharline Koolman a remarca.
El a splica tambe cu si un persona a haya e vacuna di covid-19 mas cu dos siman pasa, y e ta desea di haya e vacuna contra influenza, y esaki ta bay pa e adultonan mayor tambe (60 plus) nan ta haye via AZV. Nan ta yama DBZ na 522-4238/ 249. “Nos a spera di haya hopi yamada, pero e yamadanan ta mas di loke nos a premira y pa e motibo ey nos a pone mas personal disponible pa atende e telefonnan, y haci e afspraaknan” Koolman a agrega.
“Nos ta prefera pa cuminza cu e grupo di riesgo, mesun cos cu e grupo cu ta pa covid. Nos tin basta vacuna y si mester mas nos por busca mas tambe. Entre e covid vaccine y e griep vaccine mester tin dos siman intermedio”, el a enfatiza.
