Pabien y hopi exito na tur alumno durante Aña Escolar 2024-2025

Seccion Hubentud den Movecion ta desea tur alumno, desde crèche te scol avanza, hopi exito durante e aña escolar aki, 2024-2025.

Nos ta desea nan tambe hopi sabiduria, forza, entusiasmo, pasenshi, perseverancia y pa nunca give up den cualkier dificultad, pasobra no tur materia ta facil y semper, na algun momento mester busca ayudo cerca e Juffrouw of Meneer.

No duda den haci esaki ora ta necesario, pasobra e no ta nada cu mester descurasha un mucha.

No tur hende ta nace “sabi” y ta na caminda nos tur a siña tur cos den bida, y enseñanza escolar no ta un excepcion. Lucha pa bay dilanti pasobra cada un alumno si por! Corda cu ta boso futuro boso ta preparando, cu tur confianza y dedicacion, y sin duda cu hopi FE den Dios y den bo mes.

Tambe nos ta desea hopi forza, pasenshi, sabiduria y curashi na tur Juffrouw, Meneer, Cabesante di Scol cu tin e tarea inmenso di forma nos hobennan pa ta e ciudadanonan cu lo traha y dirigi nos Aruba di mañan y cada mayor cu ta haci tur esfuerzo pa duna e yiunan e formacion spiritual, disciplina, respet y principionan pa un bon comportacion, no solamente na cas pero den sociedad tambe.

Dios guia y bendiciona boso tur!