Renderly Trimon su proyecto “ Separa y Recicla” a bira e proyecto ganado di Poder di Hubentud 2024

Diabierna den The Venue Club, Asociacion ATHA, a presenta e resultado di e proyectonan cu mas a resalta den Poder di Hubentud edicion 10.

Directora di ATHA, Srta. Franchesca Heinze a hiba palabra y a gradici tur esnan cu a coopera pa haci e di 10 edicion di Poder di hubentud exitoso. Tabata seis siman intensivo di cual hobennan a haya diferente seminario pa nan  desaroyo personal.

Prome Minister, Sra. Evelyn Wever-Croes, tambe tabata presente pa dirigi palabra na e hobennan, y motiva nan pa sigui kere den nan soñonan.

Miss Youth, Srta. Jennely Winklaar, a briya cu su presencia pa apoya e hobennan y yuda entrega premio na esnan cu a resalta.

E siguiente premionan a ser otorga na:

Hoben mas social:

Jaylon Machado.

Hoben mas diciplina:

Brian Urquiza.

Hoben cu mas a destaca den desaroyo personal:

Janella Giromus.

Top 5 miho proyecto:

Stephanie Quant: Hubentud Empodera; Lizienne Webb: Maletin Musical; Phillip Martinus: Arte pa un y tur; Julissa Winklaar: Bo’n ta boso; Dayenne Croes: Scohe awo.

Proyecto Ganado: Renderly Trimon: Separa y Recicla.

E anochi a clausura cu un Youth Fest , presenta pa varios Dj y show di baile di ganadonan di Gang di Arte y Dream Dare Do. 

Poder di Hubentud a drenta su di ultimo fase. Esaki ta encera cu e proyecto Separa y Recicla lo ser ehecuta.

Seccion Hubentud den Movecion ta desea hopi pabien na ATHA y tur e hobennan protagonista di e bunita Proyecto “Poder di Hubentud”.  Algun potret pa cortesia di Click It Aruba.