Trabao di recap caminda di Tanki Flip bay pariba te rotonde Tanki Leendert a cuminsa

ORANJESTAD (AAN): Manera cu DIARIO a trece dilanti siman pasa, DOW lo bay pone capa nobo riba e caminda di Rotonde Tanki Flip bay pariba te Rotonde Tanki Leendert, y tambe parti di pida caminda bay nort pa Catiri.

   DOW a dicidi pa haci e proyecto aki den 4 diferente fase, y e trabaonan lo wordo haci den oranan di anochi, for di 7:00 pm te cu 3:00 am, pues marduga.

   FASE 1: Esaki a cuminsa Dialuna anochi caba. E parti aki ta for di Rotonde Tanki Flip bay pariba te na e T-weg banda di e snacktruck di Smokehouse BBQ.  Lo bay frees caminda (kita e capa bieu) e anochinan di 19, 20, y 21 di Augustus.  E caminda lo haya su asfalt bek e anochinan di 22 y 23 di Augustus.

   Aki por mira e trabaonan andando riba e prome anochi.  Henter e siman aki e lo ta cera anochi, y pa Diasabra ya pueblo lo tin asfalt nobo pa core riba dje.

   FASE 2: E parti aki lo ta for di banda di e T-weg cerca di snacktruck di Smokehouse BBQ na Tanki Flip, yega te na e cruzada di Tur Dia Foodmart (poco pabao di Tanki Leendert Service Station).  Lo bay frees e caminda e anochinan di 2, 3, y 4 di September.  Asfalt lo wordo poni e anochinan di 5 y 6 di September.

   FASE 3: E parti aki lo ta for di e cruzada di Tur Dia Foodmart bay pariba te rotonde Tanki Leendert.  Lo frees e caminda e anochinan di 16, 17, y 18 di September.  E caminda lo wordo asfalta e anochinan di 19 y 20 September.

   FASE 4: E parti aki lo ta for di e rotonde di Tanki Leendert bay nort te na altura di Catiri 22-B (algun meter panort di Reality Supermaket).  Lo frees e caminda e anochinan di 30 di September y 1 di October.   E caminda lo wordo asfalta riba un solo anochi, esta 2 di October 2024.

   DOW a splica cu ruta di desviacion di caminda lo wordo indica cu borchi y baricada di aviso.