Pa prome biaha un Hotel na Aruba a haya distincion di ‘Michelin Keys’

ORANJESTAD (AAN): Informacion cu a drenta den fin di siman, ta indica cu pa prome biaha un Hotel na Aruba ta logra haya distincion di e mundialmente famoso ‘Michelin Key’.

   Boardwalk Boutique Hotel Aruba a wordo premia cu dos Michelin Keys door di e prestigioso ‘Michelin Guide 2025’.  Di e 21 islanan den Caribe cu ta conta cu hotelnan cu Michelin Key, Aruba ta bira e unico cu ta representa e islanan ABC.

   Di e mas di 7.000 hotel cuidadosamente selecciona den e Michelin Guide, solamente 572 rond mundo a ricibi e distincion di ‘Two Keys’ den 2025.  Esaki ta pone Boardwalk den un categoria mundial di elite di hotelnan excepcional cu ta ofrece estadia extraordinario cu hopi caracter.

   Tabata na 2011 cu e rumannan morocho Kimberly y Stephanie Rooijakkers, naci na Aruba, a tuma e decision pa cumpra un refugio encantador pa practica Windsurf na Aruba.  Esaki tabata antes conoci como Plantage Tromp.  Cu vision, pasion, y hopi curason, nan a transform’e den loke ta awendia Boardwalk Boutique Hotel Aruba, un refugio di luho pa adulto, yena di encanto y alma Caribense.

   Awendia e propiedad ta conta cu 49 ‘casitas’ priva, situa mey-mey di un hardin tropical exuberante, cu su encanto colorido, su diseño di inspiracion local, y su enfoke conciente di e isla y servicio personaliza.

   Huespednan consistentemente ta elogia e experiencia cu nan ta haya na e Hotel.  Nan a duna e hotel un rating di 19.6 for di 20.  Boardwalk tin puntuacion di 4.9 for di 5 tanto riba TripAdvisor y Google Reviews.

   “Pa ricibi e reconocemento aki di un organizacion prestigioso ta un gran honor pa nos,” ta loke Kimberly Rooijakkers a bisa, kende ta e co-doño.  “E ta un testimonio di e trabao duro, pasion, compromiso y energia positivo di henter nos team, pa sigura cu nos huespednan ta disfruta di e mihor experiencia vacacional posibel na Aruba durante nan estadia cu nos”.

   Loke Two Keys di Michelin nifica: Segun e Michelin Guide 2025, esaki nifica: “Un estadia excepcional.  Un lugar cu ta berdaderamente unico y excepcional den tur sentido, unda semper ta garantiza un experiencia memorabel.  Un hotel cu caracter, personalidad, y encanto, maneha cu evidente orguyo y cuido considerabel.  Su diseño yamativo y arkitectura, hunto cu e sentido autentico di e localidad, ta converti esaki den un luga excepcional pa bo hospeda.”

   DIARIO ta felicita gerencia y tur empleado cu e fenomenal logro aki, cu ta nifica un empuhe fuerte pa Aruba su turismo.