Selfie Challenge di EPI Unit C&T
ORANJESTAD (AAN): “Selfie” ta un palabra cu bo ta uza, ora cu bo ta saca bo mesun potret pa bo keda cu recuerdonan bunita. E ta un trend popular aworaki, tambe na Aruba, y hendenan di tur edad ta participando na dje.
Contrario na loke otro hendenan negativo ta bisa, hecho ta cu si bo saca potret estilo ‘selfie’, e por crea sentimentonan positivo, door di mehora e auto-estima di e persona, segun varios estudio a demostra. Estudionan simplemente a indica cu ora bo saca Selfie, e ta pone hendenan sinti inmensamente mas feliz. Selfie ta yudabo captura momentonan feliz di bo bida, di actividadnan, y aventuranan, y ta reforza conexion cu amigonan door di comparti potretnan.
Sacamento di selfie por sirbi como un forma di expresion propio cu por yudabo descubri mas di bo mes, y presenta tambe loke ta wordo describi na Hulandes como ‘Zelfbevestiging’, esta confirmacion propio. Potret di Selfie por yuda hende celebra etapanan grandi di nan bida, y door di saca potret, bo ta sintibo aun mas conecta cu bo circulo social.
Selfie ta fomenta tambe mentalidad positivo! Pasobra ora bo ta dedica pa saca un potret fenomenal, esey ya caba ta un forma di cuida bo mes, y e acto di pone un sonrisa pa e camera, por crea un estado emocional positivo.
Cu tur esaki na cuenta, recien a organiza un competencia pa mira kende na Colegio EPI, su Unit di Ciencia y Tecnologia (C&T) por saca e mihor Selfie.
Y esaki a logra gana! Nan creatividad, union di grupo, y entusiasmo ta digno di celebracion. Colegio EPI ta gradici tur otro grupo tambe pa nan participacion y energia positivo. “Hunto nos ta crea un ambiente na scol alegre y inspirador,” ta loke e organizadornan a declara na final.
