Jonathan Trinidad, Universidad Aruba:
ORANJESTAD (AAN) Jonathan Trinidad, “Manager Social Work & Development Program” di Universidad di Aruba, relaciona cu e Carousel Social cu a tuma lugar na Colegio EPI conhuntamente cu Universidad di Aruba, dirigi na e hobennan cu ta studia e carera di Trabao Social, a bisa den entrevista cu DIARIO cu e Facultad a cambia e curriculum durante e ultimo tres añanan.
“Nos a introduci un curriculum nobo di ‘Social Work & Development’ y nos a ahust’e na e necesidadnan di diferente organizacion, pero tambe na e sector social den su totalidad”, Jonathan Trinidad a señala.
Por ehemplo, nan tin un dia di programa multilingual, por ehemplo, pa carga e diferente idiomanan. “Una bez cu bo drenta den e sector, y cu bon colaboracion y cu network como vision, trankilamente bo por adapta bo mes pa ta flexible pa e sector”, Trinidad a agrega.
El a señala cu den cada aña academico nobo nan ta purba di promove, specialmente durante e open house di Universidad di Aruba, kico Trabao Social ta, kico su programa ta contene, y kico e studiante ta caba cu ne na final di dia, no solamente conocemento sino habilidadnan tambe con pa pon’e den practica, metodonan cu ta wordo uza, y hopi importante, con e studiantenan nan comportacion por tin un impacto grandi den nan presente y futuro.
