Pa prome biaha lo tin nobena na honor di Beato José Gregorio Hernández

ORANJESTAD (AAN): Dia 30 di april 2021, dr. José Gregorio Hernández a wordo declara oficialmente Beato door di Papa Francisco.

                Esey ta haci cu Fundacion Venerable José Gregorio Hernández lo celebra pa prome biaha den e luna aki, un nobena na honor di Beato José Gregorio Hernández, pa prepara  pa su fiesta, cu ta dia 26 di october, dia di su fecha natal.

                E fundacion ta preparando un nobena biblico pa e ocasion aki y cada dia ta bay tin un reflexion diferente cu su intencion pa cada dia.

E skema di e diferente dianan di e nobena ta manera ta sigui:

                E prome dia ta dedica na tur Enfermo y nos Adultonan mayor; Di dos dia ta dedica  na nos Mayornan; Di tres dia ta dedica na  nos Mucha- y Hobennan; Di cuatro dia ta dedica na Matrimonio; Di cinco dia ta dedica na Iglesia, Papa y Clero;  Di seis dia ta dedica na Esnan den necesidad; Di siete dia ta rosario bibo y ta dedica na tur Dokter y Esnan cu ta traha den Salubridad; Di ocho dia  ta dedica na nos Gobernantenan y Di nuebe dia ta dedica na Mundo henter. 

                Pa e di nuebe y ultimo dia di e nobena ta pidi tur hende bin cu nan bela pa ofrece na nos dushi Mama Maria.

                Durante tur e dianan di e nobena, ta bay tin macuto na entrada pa pueblo por haci donacion di comestible pa esnan den necesidad.

                E nobena ta cuminsa diadomingo, dia 17 di october pa 7’or di anochi y lo sigui asina pa tur  e nuebe dianan na e Sitio di Oracion, situa na  Tanki Leendert 128. E fiesta mes ta bay ta diamars, dia 26 di october pa 7’or di anochi.

                Corda bin trempan pa bo haya bo luga. Ta sigui mantene nos mes na distancia social y uzo tapa boca.