ORANJESTAD (AAN): Ministerio Publico ta bastante satisfecho cu e prome resultadonan di e accion pa cobra boet habri.
Mas of menos diez dia pasa Ministerio Publico a acelera e accion aki di cobra boetnan cu falta di paga. Esey door di anuncia cu CEA lo bishita personanan cu debe boet entrante prome di November y hiba nan pa sinta nan detencion preventivo den KIA. Anteriormente na juli 2021 a start cu para pasaheronan na airport cu tabatin boetnan cu falta di paga.
Un balente cantidad di persona cu tabata debe boet a cumpli cu e yamada di Ministerio Publico pa bin paga. Anto pesey cu Ministerio Publico a dicidi pa warda un tiki mas cu laga CEA sali pa cuminza ehecuta e boetnan habri. CEA lo start awor te medio November cu bishita hende na cas y transporta nan pa KIA, envez di e siman aki, manera a anuncia luna pasa.
Ministerio Publico ta haci un yamada urgente na personanan cu debe boet pa pasa paga. Bo persona por paga online tambe.Bo persona por swipe tambe na balie di Ministerio Publico. Areglonan di pago no ta posible mas pa personanan cu tin un condena irevocable pa infraccionnan di trafico.
