E miho manera pa defende e curpa di malesa: ---ORANJESTAD (AAN) — No obstante cu e casonan di Covid-19 na Aruba a baha, ainda e virus ta cana rond y ta sigui infesta hende den nos comunidad.
Pero banda di dje tin otro malesanan cu tambe ta necesario pa pone atencion na nan, y pa por bringa nan ta indispensable mantene un sistema immune halto.
Sin duda ehercicio mas un dieta balansa, cu ta consisti di fruta y berdura, por aporta pa nos organismo, e elementonan nutritivo necesario pa defende nos di malesanan manera covid-19, influenza, cancer, diabetes, colesterol, entre otro.
Aworaki, cu ainda mundo sin kita Aruba afo, ta enfrentando un pandemia, e concepto di fortalece nos sistema immune pa proteha nos, no solamente di Covid-19 pero di otro agentenan infeccioso, a tuma un papel protagonico den nos bida diario.
Ta wordo papia di consumi vitamina C y D, consumi hopi fruta y berdura, tuma suplementonan manera selenio, magnesio, entre otro.
Un programa hopi interesante pa sa di dje, ta un cu ta wordo dirigi pa e nutricionista Dra. Eliana Reyes, cu yama “Programa di Obesidad y Diabetes”. E ta un docter den nutricion di e Clinica Universidad de Los Andes. E ta afirma cu pa e sistema immune funciona di manera adecuado, mester di substancianan nutritivo cu ta wordo obteni door di un alimentacion balansa, cu ta aporta vitamina, mineral y antioxidante.
E ta splica cu un alimentacion balansa ta fortalece e sistema immune y ta capaz di defende nos organismo di virus, bacteria, y muy posiblemente, di disminui e intensidad di e malesanan infeccioso cu ta surgi nos dilanti.
Pa tal motibo, e personanan obeso, cu tin un mal alimentacion, ta parti di e grupo di riesgo di Covid-19 y otro tiponan di patologia. DIARIO lo amplia e informacion aki den su siguiente edicion.
