Pa dos aña consecutivo Elmar y WEB tin campaña hunto durante temporada di calor

Audrey Croes, PR di NV Elmar:

• Pa trece concientizacion pa cuida otro y tips con pa spaar coriente 

ORANJESTAD (Aan) – Audrey Croes, Relacionista Publico di NV Elmar, den entrevista cu DIARIO a expresa cu nan ta satisfecho cu e tema di “Temporada di Calor” pasobra por ripara cu tin mas instancia, organizacion y websites ta lanta den e temporada aki loke ta hopi importante, pa trece concientizacion.

   “Pasobra e ta un tempo cu nos mester ta na haltura di dje, pasobra e tin consecuencia cu nos salud, y vooral cu nos grandinan, nos mascotanan nos kier haci un yamada pa nos cuida nan mas durante e temporada aki. Anto tambe, mas cu claro nos ta uza mas coriente den e temporada di calor”, el a señala.

   El a comenta cu ya pa dos aña consecutivo, NV Elmar y WEB Aruba NV, tin un campaña cu nan ta haci hunto den e temporada di calor, p’asina trece concientizacion y tips con pa spaar coriente.

   “Pero mas cu claro, nos kier representa nos mes durante e temporada di calor, nos tin cu cuida nos salud, pero unda cu por pa nos spaar, pero tambe e parti di seguridad; pone extra atencion na bo mascota, na e grandinan, na bo tereno ta sigur cu no tin un yerba bieu cu por coi candela. Tur e cosnan aki ta importante pa nos considera durante e temporada di calor cu ta cuminza na inicio di Juni, aunke nos ta ripara cu den Mei tambe tin ora tin hopi calor, y e ta termina e luna di mas calor cu ta September. Kiermen ainda tin mas pa bin, pues ban cuida otro durante e temporada aki”, Audrey Croes a reitera.

  Audrey Croes a menciona tambe, cu na Maart aña pasa, Elmar a lanta e Plan Acelera di Mantencion, cual ta andando ainda den full swing, y por mira online cu e compania ta publica comunicadonan pa avisa cu nan ta bay desconecta e suministro pa trabaonan di mantencion, y esaki ta andando ketobay.

“Tambe cada cuartal nos ta publica un actualizacion di e plan pa comunidad y prensa pa mira unda nos ta den e plan. Pues, esaki t’asina importante cu bo ta cuminza mira su frutonan tambe; nos tabatin un cambio den e parti di introduccion di coriente sigur, pero nos tin cu bisa cu e temporada di calor t’afecta e red di coriente, no solamente na Aruba pero den tur pais cu ta experiencia e ola di calor”, Audrey Croes a señala.