Ronella Croes, CEO di ATA ta splica:
- Ekivalente na 33% di hospedahe turistico
ORANJESTAD (AAN) Señora Ronella Croes, Directora (CEO) di Aruba Tourism Authority (ATA), den entrevista cu DIARIO, a referi na e fenomeno (plataforma) di Airbnb, cu no ta un forma local di haya alohamento, sino un plataforma internacional cu a bira hopi popular, entre otro, pa e turistanan.
“Airbnb ta un fenomeno cu aworaki ta parti integral di turismo, mundialmente. Pues bo ta mira otro paisnan, otro ciudadnan cu a mira crecemento, sigur significante, seguramente den loke ta wordo ofreci cu ta cay bao categoria di ‘short-term vacation rentals’.
Esakinan por ta apartamento, cas, espacio cu ta wordo ofreci durante un aña completo, of kizas un par di luna, pues e tin su dinamica cu ta otro cu e dinamica di hotelnan y acomodacionnan cu Aruba tabata conoce, te aworaki”, segun Ronella Croes a señala.
CEO di ATA a sigui bisa cu na Aruba sigur tin un crecemento riba e categoria aki, por ta por bisa cu esaki ta alrededor di 5.500 pa 6000 propiedad of unit, cu ta wordo ofreci cu bo por categoriza como “short-term vacation rentals”. No lubida cu esaki ta nifica, den caso di Aruba, cu esaki ta hinca den su economia.
Ronella Croes ta splica kico esaki kiermen. “Ora cu nos wak e oferta creciente, bo ta claro man den man cu esey, sigur mas hende por scoge pa keda eynan. Si mi wak e cifranan y mi a bay bek den e cifranan y a scoge aña 2015 cu ta ora nos tabata tin e fenomeno di Venezuela, di hendenan cu tabata bin akinan pa saca dollars, nos a wak e aña eynan un crecemento basta significante di hendenan cu tabata bin akinan y tabata keda den un apartamento, pa nan haci esey”, Directora di ATA a señala.
E aña ey, 33% di esnan cu a bishita Aruba a keda den un short-term vacation rental. Si wak aña pasa ta e mesun 33%. Pues, relativamente, den termino di total acomodacion y scogencia, por mira cu el a keda cu e representacion eynan. “Pero claro, cu e categoria di acomodacion akinan a crece, pero e representacion di hotelnan tambe a crece. Si mi wak otro dinamicanan di e industria aki, 2019 prome cu e pandemia, cuanto hendenan ta paga pa keda den un ‘short-term vacation rental’, esaki a subi durante e ultimo añanan. Aña pasa, un persona a paga un average di 182 Dollar pa keda den un Airbnb”, Ronella Croes a indica.
