Proteha bo salud prome cu bo bay di biahe:
ORANJESTAD (AAN): Departamento di Salud Publico ta recorda tur residente di Aruba cu tin plan pa bay di biahe pa tuma e medidanan di salud necesario prome cu nan sali. No ta importa e motibo di bo biahe sea pa vakantie, estudio, tratamento medico, negoshi of aventura bo salud mester ta proteha durante bo estadia pafo di Aruba te ora bo regresa.
Na esnan cu ta bay cierto paisnan den Caribe, Suramerica, Centroamerica of Africa, ta fuertemente recomenda pa nan busca e vacuna contra Keintura Geel. E vacuna aki ta un dosis cu ta valido pa bida largo, pero mester wordo ricibi no menos cu 10 dia prome cu biaha.
Pa awor e paisnan di riesgo ta como lo siguiente. Den Caribe ta Trinidad y Tobago.
Pa Suramerica y Centroamerica: Argentina, Bolivia, Perú, Ecuador, Colombia, Brasil, Venezuela, Paraguay, Panama, Guyana Frances, Guyana, Suriname.
Pa Africa: Angola, Benín, Burkina Faso, Burundi, Cameroon, Republica Centro Africano, Chad, Congo, Republica Democratico di Congo, Costa Marfil, Guinea Ecuatorial, Ethiopía, Gabon, Gambia, Ghana, Guinea, Guinea Bissau, Kenya, Liberia, Mali, Mauritania, Niger, Nigeria, Senegal, Sierra Leone, Zuid Sudan, Sudan, Togo, y Uganda.
Informacion importante: Tur viahero mester haya e vacuna si nan ta bay of ta keda mas cu 24 ora den un di e paisnan menciona ariba.
Si bo a ricibi e vacuna den pasado y tin bo buki geel (prueba di vacuna), bo no mester haya e vacuna atrobe.
Si bo no tin e buki geel pero a haya e vacuna na Aruba, bo por haya un duplicado na balor di 10 Florin.
E vacuna no ta recomenda pa mucha menor di 9 luna, adulto mayor di 60 aña of mas, muher na estado of cu deseo pa sali na estado den e siguiente lunanan, persona inmuno-comprometi, of cu alergia fuerte na componentenan di e vacuna (manera webo).
Pa haya e vacuna: Haci bo cita no menos cu 10 dia prome cu biaha door di yama 522-4200. Riba dia di bo cita, dirigi bo mes na Seccion di Malesanan Infeccioso, Avicenna Straat #1 (patras di edifisio principal di DVG). Trece bo identificacion valido. E costo di e vacuna ta 31 Florin, por paga solamente via Debit Card of transferencia online. Cash of credit card no ta wordo acepta.
