Lansamento oficial di Plataforma Pashentnan di Aruba

ORANJESTAD (AAN): Dia 28 di februari a tuma lugar e lansamento oficial di Plataforma Pashentnan di Aruba.

Sr. mr.dr.Jayburtt Dijkhoff cu ta presidente di Fundacion SIKI a enfatisa cu esaki ta un evento historico pa Aruba.

             Ta trata di un plataforma unda cu tur pashent di Aruba por expresa nan preocupacion- y remarcanan pa asina contribui na un mihor cuido medico. Fundacion SIKI ta un organisacion non-profit cu ta boga pa empodera e individuo y stimula cambio social positivo. E ta haci esaki a traves di curso, investigacion y actividadnan cu ta trece cambionan constructivo den sociedad.

             Un tema di enfoke di e fundacion ta e derechonan di pashent. A publica un buki y a duna hopi charla gratis pa stimula esaki, pero a yega tempo pa bay pa e siguiente nivel. P’esey a yega na un plataforma di pashent. Aruba no ta cla ainda pa un asociacion of federacion, pero si ta cla pa participa y contribui den un forma liber y igual pa tur persona.

            E plataforma ta logra su funcion pa medio di 3 punto: 1) un vocero pa pashent, 2) un plataforma digital y 3) centralisa e organisacionnan di pashent. Sr. Dijkhoff a presenta e vocero di Plataforma Pashentnan di Aruba, kende ta sra. Nurianne Arias. Sra. Arias ta un docente den maneho administrativo na Universidad di Aruba, ta studiando pa su PhD, y ta un activista pa cuido di diabetes y pashentnan en general pa hopi aña.

             E escohencia pa un profesional di e caliber aki no tabata dificil, specialmente mirando e pasion cu sra. Arias tin pa e pashent y su cuido. Sra. Arias lo fungi como e bos di e pashentnan di Aruba den cuadro di combersacion y dialogo cu entre otro ‘Kwaliteitsraad’ di Gobierno y otro entidad di salud di Aruba.

            E Kwaliteitsraad ta un organo nobo den cual tur reglanan tecnico y consehonan importante tocante cuido di salud ta wordo formalisa.

            Awor e Plataforma Pashentnan di Aruba ta drenta e fase di sigui plama e noticia aki y encurasha tur hende pa join e grupo aki riba Facebook groups: Pashentnan di Aruba. Tambe lo bay planea pa invita tur e organisacionnan di pashent join un otro canal di e plataforma.

            Adicionalmente ta preparando pa acerca hendenan grandi cu no tin facebook pa join via un canal alternativo. Esaki lo wordo anuncia pronto.