Pa di 6 luna consecutivo Aruba su turismo a sobrepasa nivelnan di aña 2019

Ministro Dangui Oduber

ORANJESTAD (AAN): Minister di Turismo y Salud Publico sr. Dangui Oduber ta informa comunidad cu e resultadonan di turismo pa luna di augustus 2022 a drenta. A ser demostra un biaha mas den luna di september 2022 cu e cifranan a sobrepasa e nivelnan di mesun luna di aña 2019. Den luna di september 2022 Aruba a ricibi 78.261 turista via nos aeropuerto. Un crecemento di 29.8% den comparacion cu luna di september 2021.

   Esaki ta un recuperacion di 106% den comparacion cu september di 2019 cu Aruba a ricibi 73,565 bishitante. Locual a resalta den e raportahe tambe ta e recuperacion di nos mercado mas importante cu ta Estados Unidos cu a registra un crecimento di 8.7% porciento compara cu september di aña 2019. Turismo ta sigui recupera, sigui crece y sigui sobrepasa nivelnan di aña 2019 cual sigur ta excepcional.

   Aruba su recuperacion den general ta na 95% porciento y tur indicador ta mustra cu nos lo bay sobrepasa 100% di recuperacion den comparacion cu aña 2019 pa final di aña 2022. Aruba ta na di dos puesto mundialmente den e paisnan cu miho recuperacion di su turismo. Recientemente Aruba a gana e “Destination Resilience Award” for di Caribbean Hotel and Tourism Association (CHTA) pa e trabaonan desplega durante e pandemia.

   Aeroliñanan tin confianza den Aruba y esaki bo ta mire den e diferente rutanan nobo cu nos tin na diferente pais.

Minister Oduber ta gradici tur e partner nan den turismo cu cu ta haci cu awe Aruba ta recuperando acceleradamente. Danki na e pueblo cu a demostra di ta uno resiliente, ban sigui demostra nos cordialidad y duna e hopitalidad na cu nos ta conoci pe. Turismo ta keda e driver principal di nos economia.