ORANJESTAD (AAN): Un situacion di emergencia a presenta su mes Dialuna merdia na un crêche na Bloemond 24-B, y mesora a pidi presencia di Ambulans.
Net ora cu un unidad di Polis a pasa den e area, y a bay check pa duna un man na e asistencia, y nan a bin compronde cu un baby a stop di hala rosea. Aki Polisnan a pidi Recherche y oficialnan forensico di BFTO pa acudi na e crêche pa documenta e caso.
A resulta cu ta un criatura cu ta kedando eynan, diripiente a haya problema pa hala rosea. Paramediconan mesora a cuminza practica CPR riba e mucha pa asina trata na stabiliza e criatura. Ora cu nan a sinti cu e ta cuminza hala rosea bek, nan a sali cu urgencia rumbo pa Hospital, cu escolta Policial, unda mesora Pediatranan y demas specialistanan a atende. Nan a haci tur lo posible, pero vocero di Polis Lito Lacle, a indica cu pa 6:43 pm, Docter a constata morto di e criatura. Ta trata di e baby Elizienne E. de Cuba di apenas 6 luna di edad.
Ministerio Publico lo tin di dicidi si acaso ta start investigacion. Na famianan di Elizienne, DIARIO y Cuerpo Policial ta extende su mas profundo palabra di condolencia.
