Svetlana, yiu di Stalin, a bandona Rusia y splica comunismo
* Vladimir Putin ta pone su mes y mundo lomba contra muraya
* Mascarada di comunismo ta cay den e lama di sanger cu el a crea
ORANJESTAD(AAN)- Cuanto placa mundo a gasta pa trata na evita loke ta socede awe? Cuanto bida a bay perdi den e confrontacion entre mundo liber y comunismo?
Awe tanto conflicto pisa cu mundo a conoce, ta pasa dilanti bista ora trata analisa kico por spera na mundo cu comunismo a tene den su gara for di momento cu el a introduci su mes na Union Sovietico?
Guera di Korea. Guera di Vietnam. Famianan cu a wordo separa for di otro na Alemania durante tanto tempo.
Cuanto crueldad di tirania Comunista cu a base di mentira a conkista mundo dor di mentira?
Den region di Caribe por a mira nacemento di Cuba Comunista, cu a bira e centro di accion di Moscu. E tension di 1961 ora Caribe a pensa cu e ta bira centro di un conflicto mundial cu no a bira un confrontacion directo pero si e manipulacion pa habri porta pa asina Comunismo por a abusa di miseria di Pueblo y gara poder den region di Aruba.
Pa e mascarada di Comunismo cay, semper tabata tin mester di sanger di hende pa e conquista terenonan cu despues el a zink den dolor.
Cualkier analisis ta mustra con for di su nacemento, comunismo a manipula hende cu el a trapa bou su botanan di mentira pa por a haya poder.
Mester di hopi ehempel? Kico a pasa na Venezuela? Pakico Miyones di Venezolano no por biba na nan pais?
Paisnan mara na terorismo ta loke Nicolas Maduro kier atrae pa sigui forma rio di sanger humano den cual mundo ta hoga na man di dirigentenan mas cruel cu cualkier animal salvahe.
Kico Comunismo a entrega mundo? Kico e trahador cu a wordo inspira pa comunismo y a entrega su pais na e regimen di abuso, a alcansa?
E paisnan cu mas dolor humano ta pais comunista y e motibo awe ta bira conoci pa mundo cu a permiti Rusia yega leo.
Mundo liber tabata tin demasiado ansha pa yega loke nan a kere ta un solucion pa guera friu cu a sigui despues di Segunda Guera Mundial pa motibo di expansion Comunista.
Mundo liber a permiti e centro di Comunismo na Rusia cu tabata na cabez di Union Sovietico, crea e lama di sanger cu mundo a conoce na tanto pais.
Kico a pasa den e Guera na Ukraine? Rusia manera semper, no a haci nada. Rusia ta santo, cu mester haya tur oportunidad pa e mata y abusa pa asina tin supuesto paz.
Esey ta e berdad cu atrobe ta bini dilanti ora mira con un homber manera Vladimir Putin pa por keda na poder ta mata hende manera ta mata cacalaca.
Henter mundo a wordo destrui pa e hamber di poder di un despota cu ainda tin su siguidornan, pasobra nos no mester perde for di bista cu ainda tin hende ta kere, cu comunismo ta e solucion pasobra ta cumbini nan pensa asina.
Aruba no mester bay leu for di cas pa mira e motibo pa cual comunismo ta sigui crece.
Aruba kier a entrega su economia y asina su mes na Nicolas Maduro y e compania di Nicolas Maduro cu placa di Rusia a tene cabez riba awa.
Esaki ta e berdad di mundo, cu a kere cu Rusia no ta peliger mas, mientras camponan di concentracion Comunista nunca a stop di existi aunke nan tin otro nomber manera na Siberia y den prisonnan scondi.
“Binti carta na un amigo,” tabata e buki di e yiu di Stalin, Svetlana, cu awe ta yuda ora ta compila realidad di un mundo cu mester puntra su mes si e ta dilanti un guera mundial.
El a splica mundo kico ta comunismo, cu el a laga atras como yiu di Stalin, uno di e hombernan mas cruel cu comunismo a produci,
Mundo ta lomba contra muraya segun deseo di Vladimir Putin cu atrobe ta pone Nacionnan Uni y cantidad di organo importante na mundo na careda, den su ansha pa keda na poder.
Henter mundo ta den problema. No tin awa. No tin coriente. Cuminda a bira caro y na Alemania, un dia dividi pa motibo di comunismo, hende ta bende nan prenda pa por come.
Mundo ta na guera, manera semper a tabata pa motibo di Comunismo cu mundo a duna chens di crea su mundo di mentira.
Awe Putin ta kira e mascarada di amor pa hende pa e Stalin recorda hende kico ta nifica crueldad di comunismo, cu no conoce piedad.
