Pa di 18 aña RBC Royal Bank ta patrocinador principal di expo Lens di mi Wowonan

E lo wordo inaugura awenochi...

• Lo bay honra cuatro fotografo 

ORANJESTAD (AAN): Pa di diesocho aña, RBC Royal Bank Aruba NV ta sostene e expo di prensa yama ‘Lens di mi Wowonan’.  Esey ta loke Pierre Rafini, director di e banco a declara Dialuna mainta durante un conferencia di prensa na su nan oficina principal.

   Pa 18 aña, e expo aki a reuni fotografo-, periodistanan y comunidad en general pa celebra e storianan conta door di lens.  El a bisa cu cada un di e 18 añanan aki, RBC Royal Bank Aruba NV a sinti su mes orguyoso di acompaña e iniciativa aki como nan patrocinador principal.  E ta refleha un compromiso profundo cu arte, cultura, y e personanan cu ta documenta bida na Aruba.

   Segun Rafini, e aña aki e exposicion ta dedica na Departamento di Cultura Aruba (DCA) na ocasion di su 48 aniversario.  Durante casi cinco decada DCA a traha pa conserva, documenta y promove e patrimonio cultural. E dedicacion ey ta haya un significancia ainda mas grandi e aña aki ya cu Aruba tambe ta celebra 70 aña di su Escudo Nacional, 50 aña di Himno y Bandera, y tambe nos a celebra 40 aña di Status Aparte.  Pesey e edicion aki ta, den hopi sentido, un homenahe na identidad mes, na ken nos ta y na e institucion y simbolonan cu ta uni nos como pais.

   Un comunidad ta prospera ora cu su cultura ta worde mira, aprecia y conserva.  Ta pesey e colaboracion aki ta importante pa RBC Royal Bank.

   “Ora nos ta sostene e personanan tras di e lens, nos ta sostene esnan cu ta tene nos historia bibo,” Rafini a declara.

   Expo lo cuminza awe: E exposicion ‘Lens di mi Wowonan’ ta cuminza awe Diamars 1 di September 2026 pa 7:00 pm na Biblioteca Nacional na Playa.  E ta keda habri pa publico te cu dia 30 di September, y durante horarionan regular di servicio di Biblioteca.

   E aña aki tambe lo reconoce cuatro fotografo, kende nan trayectoria profesional ta representa e spirito di e exposicion aki.

   E premio ‘Djispie Franken’ e aña aki ta bay pa Eric Boeldak, kende a cuminza su mundo di fotografia na Hulanda y a traha tambe 10 aña pa e corant local ‘The News’, y te ainda e ta trahando riba su mes como fotografo.

   E premio Victor Winklaar e aña aki ta bay na e Urig Feliciana, kende a start como fotografo na Bon Dia Aruba, y despues a bay Telearuba y amplia su mes no djis como fotografo, sino cameraman, editor di video y diseñador grafico, y awor ta cu MasNoticia.com

   Tambe tin reconocemento special na Michelangelo Arends, kende tin mas di 10 aña experiencia di fotografia submarino.  Tambe lo honra Noel Werleman, kende ta fotografo independiente cu hopi aña ta cubri deporte, specialmente competencianan grandi nacional y internacional, cooperando cu Telearuba y Comite Olimpico Arubano.  El a cubri seleccion di Aruba na 3 Olimpiada caba.

   Esaki ta e cara- y storianan tras di e exposicion di e aña aki. Nan trabao ta documenta nos historia, inspira futuro generacionnan y promove Aruba tanto na nivel local como tambe internacional.

   Pierre Rafini a gradici tambe e motor tras di e Exposicion, esta Leo Vrolijk y su team dedica, kendenan ta sigui eleva e nivel di evento aki aña tras di aña, y RBC Royal Bank ta sinti nan mes orguyoso di sigui para banda di e proyecto aki.

   “Na e miembronan di prensa, mi kier a bisa boso danki awe, y pa e papel cu boso tin den conta e historia di Aruba. Nos ta spera cu boso lo yuda nos comparti cu boso audiencianan e noticia tocante exposicion aki di e aña aki, e imagennan cu lo wordo exhibi e luna aki,” e director di Banco a declara.  “Finalmente RBC kier a felicita tur medio di prensa y tur periodista, sea independiente of cu ta traha trabao na un medio, nos kier a desea nan un feliz dia di prensa, y nos ta gradici boso pa e trabao dificil cu boso ta haci pa keda tene pueblo informa riba tur loke cu ta pasa riba Aruba y internacionalmente.”