E preocupacion di mas grandi awo ta cu lo kita acceso na costa Noord-Oost pa tur hende

Tour Operators Uni:

ORANJESTAD (AAN): Loke a cuminsa manera un disgusto entre operadornan di tour local pa e clausura abrupto di e ruta California Lighthouse - Alto Vista bek na Juni, awe ta bati alarma pa miembronan di Tour Operators Uni. Esaki debi na e caso cu lo wordo trata den Corte dia 10 di September venidero entre Aruba Birdlife Conservation contra Pais Aruba y Aruba Conservation Foundation (ACF) - Parke Arikok.

   Na raiz di e demanda aki algun consecuencia alarmante cu ta priva nos hendenan di disfruta di nan mesun isla. “Nos preocupacion no ta riba habri of cera ningun ruta mas. Aworaki nos preocupacion di mas grandi ta cu lo exclui tur vehiculo di motor pa drenta ‘natuurgebied’ den Parke. Esaki kiermen cu te hasta nos piscadonan no lo tin acceso na boca of playanan y nos mesun hendenan tampoco lo por sali core rond den famia na nos costa Noord por ehempel”, asina Sr. De Mey a expresa durante e reunion cu Parlamentarionan siman pasa.

   Den buskeda di dialogo y solucion pa e clausura di e ruta di lighthouse, hopi informacion a bin sali na cla relaciona cu e Ley di ROPV y e demanda aki di Aruba Birdlife Conservation. Ta papia di conserva nos naturalesa pa medio di 3 territorio proteha: 1. Duin di California & Saliña Tierra del Sol 2. Tera Cora & ‘Noordoostkust’ 3. Tres Trapi E territorionan aki ta encera areanan cu ta core di California Lighthouse te cu Daimari y ta inclui luganan gusta pa localnan manera: Andicuri, Wariruri, Black Stone Beach (zona di piscadornan), Bushiribana y Trinity Natural Bridge. Ademas, e ta inclui e area di Tres Trapi te cu e parkinglot di Boca Catalina y e costa Noord-Oost cu ta caba te na frontera di Parke Arikok (Natuurgebied).

  E informacionnan aki a wordo dialoga y confima cu Parlamentarionan siman pasa den reunion cu e comision di Tour Operators Uni.

   Pa loke ta e caso, adicionalmente, Aruba Birdlife Conservation kier cobra pais Aruba 750.000 mil florin pa dia, si cualkier hende (tour operators, turista, piscado of local) core den e area proteha aki. Pues, tur e camindanan aki lo por keda cera pa tur vehiculo di motor. Segun cifranan obteni pa Tour Operators Uni, Parke Nacional Arikok ta conta cu un aporte financiero di aproximadamente riba 6 miyon florin pa medio di nan ‘admission fee’, cual operadornan di tour local tambe ta forma gran parti di dje. Consecuentemente, e miembronan di Tour Operators Uni ta teme cu e resultado di e caso di Aruba Birdlife Conservation y prohibicion di vehiculo di motor na e areanan protehi aki lo por nifica cu Parke Arikok eventualmente tambe lo cera su portanan por completo.

   E miembronan di Tour Operators Uni ta sumamente preocupa pa e ultimo desaroyonan aki y lamentablemente, ta constata cu e problema a bay hopi mas leu cu djis e operacion di nos companianan local. Awo, mas cu nunca ta sigur cu e consecuencia di e caso aki lo afecta comunidad di Aruba por completo. Mientras tanto, dia 4 di September venidero lo tene un reunion cu Minister di Infrastructura y stakeholders concerni pa mira si por yega na un solucion definitivo.