Pa compronde mihor pakico a pone Micropaving riba caminda di Green Corridor

ORANJESTAD (AAN): Siman pasa por a tende varios reclamo di habitantenan di Sabana Basora y parti di Pos Chiquito,

ora nan a mira trabao ta wordo haci riba Green Corridor pa haci algo cu e capa mas ariba di e asfalt existente.

   Algun hende a puntra, pakico ta pone asfalt aki riba caminda ya existente, siendo cu tin algun area di Sabana Basora y tambe Pos Chiquito cu tin como 25 aña y pico ta wardando sikiera caminda di azeta of asfalt.

   Ta parce cu barionan no ta conta, y ciudadanonan di e otro areanan aki cu ainda caminda di santo dilanti cas, ta wordo trata como 4o of 5o Categoria.

   Reaccion di DOW:  Ya caba den fin di siman, DOW a tuma nota cu tin varios reaccion tocante e “asfaltamento” cu ta Micropaving den e areanan di Pos Chiquito y Savaneta.

   DOW ta corda tur hende, cu esaki no ta un trabao di DOW, sino e ta un proyecto di mantencion cu e compania CIC NV mester haci pa alarga e asfalt y esaki solamente lo wordo haci riba e proyecto di Green Corridor completo.

   Pa loke ta e otro camindanan, DOW tin un lista di cua caminda lo haya asfalt y dentro di poco nan lo anuncia ki dia lo cuminsa.

   Loke ta Micropaving: Hendenan ta kere cu loke a socede cu Micropaving riba Green Corridor ta ponemento di capa nobo di asfalt.  Esey no ta corecto.  E ta djis un seal cu ta wordo basha riba e capa existente di superficie di asfalt, y a wordo diseña pa seya, proteha, y extende e bida di e superficie aki di asfalt.

  E aplicacion aki ta envolvi uzo di un machin cu ta aplica un sorto di lijm di emulsion modifica di polymer, cu ta wordo poni directamente dilanti e screen di asfalt, unda un capa ultra-fini di asfalt cayente special ta wordo poni.

   Micropaving no solamente ta mehora e durabilidad di e superficie di caya, compara cu asfalt normal, pero ta reduci e costo di ciclo di bida entre 25% pa 40%, y ta duna e caminda un extra 6 pa 8 aña mas di bida unavez cu nan pone riba dje.