Otro siman City Inspector lo cuminza raspa autonan bieu den Savaneta

ORANJESTAD (AAN): E situacion di autonan bieu cu ta wordo laga atras riba acera y demas caminda publico, a cuminza cu bario di San Nicolas cu a bay basta bon.

   “San Nicolas no a keda completamente cla, pero nos a para pa motibo di mudamento, pero awor nos ta cla pa cuminza,” ta loke vocero Robby Rosel di Bureau City Inspector a indica na DIARIO.

   Dialuna dia 10 di October, lo sigui den distrito di Savaneta.  Ya caba crew di City Inspector a cuminza inspecciona e vehiculonan cu nan a mira benta banda di caminda, of riba acera, pa asina papia cu e propietarionan prome.  Ta check si acaso nan ta OK pa City Inspector kita e vehiculo, of nan mes lo haci algo.

   Dialuna y Diamars venidero, Bureau City Inspector lo subi riba caya acompaña pa oficialnan di Polis, hunto cu 3 unidad di Takelwagen pa asina kita e autonan mahos aki for di riba caya publico, y elimina nan.

  Autonan bieu, wacharaca, lo wordo kita y hiba pa Daltra.

   Nan no a sigui debi cu City Inspector tabata mudando, y tambe debi cu tabatin e candela cu a kima riba tereno di Daltra na Barcadera.  Pero awor segun Rosel, nan ta full cla pa e accion riba caya.  “Pasobra awor Daltra ta funciona bek y nan ta habri di Dialuna pa Diahuebs,” el a bisa.

   Den Savaneta enberdad tin hopi auto bieu, cu ta kibra, na werki, y djis ta un estorbo pa peatonnan, benta tur caminda.  Pero entrante Dialuna, un aire fresco lo bay pasa den e distrito.  City Inspector despues di Savaneta, lo sigui cu e resto di barionan.

   Rosel ta pidi comunidad pa ta comprensivo y duna un man na City Inspector pa yuda soluciona problema.

   “Si bo sa unda tin auto bieu, y autonan cu no ta riba wiel mas, autonan cu no tin motor mas, ni bentana, y no ta sirbi mas, yama nos na 582-9777 y sigur City Inspector lo pasa wak nan,” Robby Rosel a indica.

   October ta dedica na Savaneta, y cada luna lo anuncia ta den ki bario City Inspector lo pasa raspa.  Pero si acaso tin di bolbe pasa den San Nicolas of Savaneta, nan lo haci esey tambe.