Inspectie di IVA ta reacciona riba Asociacion di Dentistanan
ORANJESTAD (AAN): Hopi hende a comenta den comunidad, ta kico ta pasando cu e famoso “control riguroso” cu semper Inspectie di IVA ta conoci pe. Un control y mantenimento di reglanan estricto pa sigura bon bienestar di salud publico pa comunidad.
Nan ta referi aki na diferente bandera cora cu e Asociacion ADS a hisa e siman aki relaciona cu cierto procedimento incorecto cu ta wordo permiti pa sigui socede riba e isla aki den mundo di Dentistanan.
Inspectie di IVA a tuma nota di e denuncianan aki haci door di ADS. Segun e dama Frances Rugebregt, MSc., kende ta funcionario di comunicacion pa IVA, mesora e instancia di Volksgezonheid aki a reacciona directamente cu ADS riba e observacionnan aki.
IVA ta haya importante, cu asina un instancia tin preocupacion, pa nan comunica esey directamente cu e instancia di cuido pasobra asina bo ta soluciona cualkier problema of inquietud, y ta start un discusion cu otro y esey ta hopi importante.
Rugebregt a mustra cu enberdad nan a topa nota di e preocupacion di Dentistanan na Aruba, cu ta referi na cierto practica ilegal, cu ADS a bisa cu nan a bati alarma na IVA, pero tin preocupacion cu nada ta wordo haci.
El a splica cu Inspectie na IVA no ta esnan cu ta registra dunadornan di cuido den e registro di AruBIG, como cu esey ta un tarea di DVG. Aki tur dunador di cuido ta pasa pa nan control di nan diploma, demas documento, pa nan wordo registra.
Inspectie ta bin despues pa controla esnan cu ta registra den e AruBIG, pero tambe control en general. Tambe ta controla esnan cu no por registra ainda, riba nan experticio di nan tereno di estudio, y con nan ta haci nan trabao pa e cuido di comunidad.
Den e caso di cuido dental, e ta un tiki fastioso como cu aworaki cu e introduccion di AruBIG, e dentistanan tin un ‘beroepsbescherming’, esta cu nan por yama nan mes ‘Dentista’ y cu esey ta bin cu nan tin cierto trabao cu nan so mag di haci por ehemplo, como cu e ta describi asina den ley. Pero pa otro profesion cu no tin inscribi den AruBIG ainda, esey ta hopi dificil, pues hopi tarea no ta bon ‘defini’. Y banda di e reaccion di Asociacion ADS, a ripara tambe cu e interpretacion di ley no ta full corecto.
Esey ta loke IVA a manda bisa Asociacion ADS, y cu si nan tin mas pregunta por acudi cerca nan pa asina por discuti esaki mihor.
Pa Inspectie di IVA ta valido e argumento, cu ora cu algo no ta defini den ley pa cu funcion, e ora bo por defini esey den e maneho. Na 2020 a publica un rapport encuanto Cuido Dental na Aruba, y un copia di esey ta tur profesional den Cuido Dental a ricibi’e tambe. Aki a menciona cu ta importante pa delinea precisamente kico e diferente profesionnan den cuido dental por haci, pasobra esey ta algo cu ley no ta defini. Esaki ta algo cu ta un tarea di e kwaliteitsinstituut por ehemplo pero tambe di Asociacion ADS mes, unda nan ta e profesionalnan den grupo di cuido dental unda por delinea precisamente kico un dentista por haci, kico un tandprotheticus por haci, of orthodontist por haci. Esey si no ta full describi, e ta un tiki habri, pues un ‘gray area’.
