ORANJESTAD (AAN) – “Polisnan di Bario” ta e tema cu Parlamentario Darlaine Guedez-Erasmus, di fraccion di MEP, a toca Diahuebs mainta, den conferencia di prensa di e fraccion.
Parlamentario Guedez a expresa cu pa henter comunidad polisnan di bario ta hopi importante, y el a constata esaki despues cu Diabierna ultimo y Diaranzon anochi, e tabata presente den e encuentronan di polis di bario y habitantenan.
E parlamentario a bisa cu esaki tabata un bon momento unda e habitantenan di bario a haya informacion hopi valioso y importante, e parlamentario a señala.
El a referi na e tarea di un polis di bario. Darlaine Guedez-Erasmus a expresa cu hopi biaha ora nos ta pensa riba polis ta pensa riba asistencia, pelea, ora tin discusionnan, of musica na volumen halto, cu polis ta yega. Pero esaki ta bay hopi mas aya di kico un polis ta haci.
Polis di bario ta e persona cu ta keda den e bario pa vigila, crea contacto y mira con cosnan ta andando den e bario, por ehemplo e mucha y hobennan cu ta biba den e bario. Hasta, polis di bario ta participa den e parti recreacional pa muchanan, cu FCCA, di manera cu nan por comparti cu otro y ser conoci cu otro.
Tambe polis di bario ta zorg pa e aspecto di limpieza di e bario y tambe ta handle cu cacho si nan ta duna molester den bario of si mester di ayudo, segun e parlamentario a observa.
El a agrega cu polis di bario ta pendiente tambe di e adultonan mayor, si nan mester di ayudo vooral si nan ta biba nan so den cas.
E parlamentario a comenta cu awendia tin hopi adulto mayor ta biba nan so, y tin biaha por lesa den noticia cu un a fayece y ta bin ripara despues di un par di dia e bisiñanan ta haya sa, ora e familiarnan yega.
El a remarca cu pesey ta hopi importante cu tin polis di bario den cada distrito, bario y sub-bario cu ta forma e distrito grandi.
Durante e dos anochinan cu e tabata presente a mira con e habitantenan ta wordo scucha door di polis. Tambe, el a indica, ta importante pa menciona cu tabata tin instancianan presente, departamentonan cu ta traha hunto cu polis. Ora polis di bario ta wordo notifica di algo, e ta bay di biaha na e departamento concerni pa asina haya ayudo y soluciona e problema of preocupacion di e habitante. El a experiencia durante e dos anochinan cu e habitantenan ta haci hopi pregunta na e departamentonan cu ta scucha y atende cu esey, y purba busca solucion ainda mas lihe. Guedez-Erasmus a subraya cu polis di bario, encabeza pa señora Trudy Hassel, ta haciendo un tremendo trabao, y e por a wak tambe nan motivacion y cu ta cla pa brinda ayudo y sosten. E reunionnan aki tabata den un bon ambiente, y como Parlamentario, el a acentua, e ta hopi contento di mira con e desaroyo di polisnan di bario ta bayendo. E ta convenci cu esaki ta un speranza unda e problemanan social por cana stap pa stap y haya solucion pa nan.
