Oportunidad pa artistanan di Aruba crea un mural riba ‘Icon of the Seas’

E crusero mas nobo cu ta casi keda cla

ORANJESTAD (AAN): Un bon noticia pa artistanan den Caribe!  Esey ta inclui artistanan local di Aruba, cu pronto lo haya e chens di desplega nan arte abordo di e barco crusero nobo di Royal Caribbean, cu ta carga e nomber di ‘Icon of the Seas’.

   Tres artista Caribense lo keda selecta pa crea un mural den un di e tres areanan abordo di ‘Icon of the Seas’ prome cu e barco oficialmente cuminsa cu su itinerario na Januari 2024 venidero.

   E tres areanan caminda e muralnan lo bini, ta e area di embarcacion, e area di ‘Royal Promenade’ y e ‘Suite Sundeck’ cu ta un area VIP pa solamente huesped di e suitenan.

   Artistanan procedente di tur destinacion Caribense di Royal Caribbean por participa na e asina yama ‘Artist Discovery Program’ aki y desplega nan arte riba ‘Icon of the ‘Seas’ di Royal Caribbean.

   DIARIO a compronde cu esaki ta un gran oportunidad pa e artista local mustra su arte, creatividad y cultura na e miyones di pasaheronan cu ta viaha via cruseronan di Royal Caribbean tur aña.

   Artistanan local cu ta interesa por subi riba website di Royal Caribbean caminda por haya e termino y condicionnan pa participa y tambe con pa aplica:

www.bit.ly/muralcrusero

   Aplicacion ta posibel te cu mayan Diamars 4 di April.  E artistanan cu keda selecta lo ricibi un comision pa su trabao.  Esaki ta varia for di $20.000 te cu $105.000.  Lo bo tin di viaha pa Finlandia y keda di 10 di Juni te cu 14 di Augustus 2023 pa traha riba e muralnan aki.