MIAMI: E dia a yega! Diadomingo e cantante di Barranquilla, esta Shakira a subi avion cu su yiunan, y a sali rumbo pa Florida, y asina poniendo un fin di su 12 aña residente di Barcelona na Spaña.
El a bandona e cas unda el a formaliza su relacion cu e futbolista Gerard Piqué, y a haya su yiunan Milán y Sasha.
Motiva pa su separacion cu e futbolista dia 4 di Juni di aña pasa, Shakira a dicidi na pone riba 2 di April 2023 un fin di su estadia na teritorio Europeo. El a subi un avion priva, esta un Embraer Legacy 600
Awor cu su yiunan chikito, e lo cuminza cu un etapa nobo na suelo Mericano, despues cu el a logra haya su custodia dia 9 di November.
Prensa na Spaña a confirma cu e muchanan tin tur cos cla pa cuminza haya les na Miami Country Day School, cu ta un scol priva hopi prestigioso pa duna les for di Scol Preparatorio te na di 12 grado na Florida. Aki mayornan tin di paga entre $33 mil te cu $46 mil pa luna na e scol pa cada alumno. Tin registra cu Milán y Sasha lo cuminza haya les entrante Diamars 11 di April 2023.
Shakira a logra libera e obstaculonan cu tabata stroba su mudanza na comienzo di 2023, pasobra segun e Acuerdo di Divorcio cu Pique, e tin caminda liber pa haci esey te ora cu 2022 finaliza.
E motibonan cu a stroba e Reina di Pop di acelera e traslado aki tabata e estado delicado di salud di su tata William Mebarak kende a sufri un recauda fuerte e aña prome y cu a pone keda bao observacion medico.
Awor e ta spera cu na Miami, e por wordo interveni cu cirugia pa por acompaña felizmente su yiu muher den e etapa nobo aki. Pa colmo algun dia prome el a preocupa pa su mama Nidia Ripoll, kende a wordo hospitaliza urgentemente na Barcelona debi na trombosis den un pia.
Tur esaki ta pone cu awor Piqué lo por mira su yiunan diez dia pa luna, y total di 3 periodo di vakantie cu tin na Merca, como tambe Pasco y vakantie grandi. Segun e acuerdo di divorcio, Piqué por cruza Oceano Atlantico pa mira su yiunan cuanto biaha cu e kier, y e gastonan lo core riba cuenta di nan dos.
Na Miami, Shakira y su famia lo bay biba den un mansion luhoso cu e cantante a cumpra na 2001 pa mas di 3 miyon Dollar, y cu tin un tereno di 750 meter cuadra na North Bay Road Drive, un sector exclusivo unda tambe otro artistanan di caliber manera Jennifer Lopez, Ricky Martin, y Matt Damon tin cas.
