Olanan fuerte a destrui parti di Linear Park pa bay Malmok

ORANJESTAD (AAN): E situacion di tempo den fin di siman a trece dolor di cabes pa esnan cu ta encarga pa haci mantenimento na diferente beach riba Aruba.

  E cambio di biento, combina cu e presion abao di atmosfera, y mirando e hecho cu den fin di siman tabata marea halto, y pa colmo labadera for di west pone cu lama bruto a keda pusha olanan basta grandi cu a azota costa banda pabao.

   Esaki dado momento a subi tera y inunda tur e palapanan cu tin pabao di La Cabana All Suite Beach Resort como tambe Amsterdam Manor.

   Mas panort den area di Fisherman’s Huts, aki lama a coba beach y a yega te na e Linear Park cu ta bay pa Malmok, y aki a destrui parcialmente parti di e pasiyo special traha aki.  Muraya y parti di e Linear Park a kibra, manera por mira riba e potret.

   Lama a subi tera tambe na Arashi, y na Boca Catalina e tabata produci olanan fuerte.  Na Fisherman’s Huts nan tabata mira di leu con e olanan tabata produci situacionnan ideal pa haci bodysurf riba dje, pero ni e expertonan mes no a confia di subi lama.

   Na altura di Tamarijn Beach Resort, un biaha mas lama a coba bin aden y destrui parti grandi di e beach, y e Wave Breaker cu tin dilanti e resort.