Mester pone mundo den su contexto pa Aruba confronta mañan
- Covid-19 te ainda tin resultado mucho mas pisa cu un recesion
- 2024 y cinco aña cu Covid-19 a destrui planificacion di mundo
ORANJESTAD (AAN)- Covid-19 a destrui e base financiero y economico social, cu te awe no ta stabil.
Covid-19 a haci su entrada, na momento cu mundo ya tabata atende cambio di clima y cu directamente despues di Covid-19 a tene e Congreso di Clima na 2021, cu ta salida di petroleo pa scapa clima.
E poder di petroleo a cuminsa manifesta su mes atrobe y prijs di petroleo a subi manera un fli, causando inflacion na mundo cu tabata papia di un recesion na 2023.
Intervencion di paisnan a haci cu e recesion no a logra e destruccion economico cu Covid-19 si a logra na 2020 y e impacto cu Covid-19 te awe tin.
Paisnan grandi te awe ta revela nan cifranan cu ta indica e sumanan enorme cu ta representa gastonan na cual nan ta mara te awe, como resultado di e pandemia.
Informacionnan oficial na paisnan manera Merca, ta acompaña pa cifranan cu ta splica e impacto financiero di Covid-19 cu awe ainda ta causa gastonan pa gobernacion.
E nomber Covid-19 ta recorda mundo, cu na 2024 lo ta cinco aña pasa, cu den loke te awe ta un misterio, e coronavirus nobo a haci su entrada silencioso na 2019.
E coronavirus tabata motibo di un enfermedad mortal cu a a amenasa henter mundo y te awe ta amenasa mundo riba tereno medico. Pero na mes momento e coronavirus a destrui economia mundial.
Covid-19 pa su duracion, por wordo considera mas cu un recesion. E malesa a ocasiona un depresion total.
Ora papia di un recesion ta papia di un situacion cu ta afecta economia pa mas cu seis luna generalmente. Ora papia di un depresion, ta papia di un caida economico, cu ta manifesta su mes pa años.
Mientras despues di Covid-19 mundo tabata tin miedo pa un recesion ocasiona pa aumento di prijs, durante Covid-19 mester papia di un depresion total cu a destrui economia mundial, cu te awe ta afecta y ta wordo amenasa pa e medidanan cu mester tuma pa cambio di clima, cu tambe tin dos aspecto.
Tanto den e caso di Covid-19 como den e medidanan relaciona cu clima, ta topa cu e berdad, cu bienestar financiero ta wordo sacrifica pa scapa bida di hende.
For di momento cu Covid-19 a haci su entrada, el a destrui e normalidad di mundo y e agenda original di mundo, cu a cambia hopi pa motibo di Covid-19.
For di final di 2019, ora den silencio Covid19 a lanza su atake, te awe na entrada di 2024, mundo ta conoce cambio na forma acelera, pa motibo di Covid-19.
Den e recuperacion economico mundial despues di Covid-19 a incorpora plannan cu mester tabata pa futuro pero cu unabez ta haci gasto, a bira realidad prome cu nan tempo.
Awe e rabo di Covid-19 ta uni cu guera na un mundo cu debenan nacional espantoso cu a resulta di e necesidad pa silencia economia y haci uzo di fondonan nacional pa scapa bida.
Incertidumbre ta manifesta su mes na caminda pa 2024, cu un serie di preguntanan habri na un mundo, cu for di momento cu Covid-19 a deshaci di e baluarte di ayera, no a haya oportunidad pa un recuperacion bon planifica a base di stabilidad mundial cu ta un exigencia pa bienestar.
Den tanto problema cu mundo conoce, tin e tendencia pa lubida Covid-19. Pero cuanto el a costa y ta costa mundo te awor? Rapportnan di DIARIO ta duna prueba cuanto placa a wordo gasta rond mundo.
Pa Aruba comprende kico 2024 lo trece, mester comprende kico te cu 2023 a wordo produci na un mundo, cu te awe conoce e malesa Covid-19, cu ta mas cu un recesion.
Despues di Covid-19, mundo tabata den e necesidad pa pone su planificacion den practica, loke no tabata e caso completo.
Na Aruba cifranan a demostra e peso financiero real di Covid-19 pa Gobierno pa medio di e medidanan cu mester a tuma pero tambe e impacto pues cu covid-19 tabata tin riba salud di hende y incidencia di Covid-19, cu ya no tin nomber di Pandemia.
Na 2024 mundo lo recorda con na 2019, Covid-19 tabata prepara pa ataca mundo, cu a wordo destrui.
Na 2024, den e tension di gueranan cu resultadonan internacional, e peso cu Covid-19 a laga atras pa practicamente tur pais na mundo, ta mishi cu placa cu paisnan mester tin pa confronta desenlacenan inespera na un mundo cu un nivel di inseguridad enorme sin un bista cla riba loke por spera hasta riba termimo mas cortico.
Na caminda pa cinco aña Covid-19, lo ta bon pa tur sector no deshaci di e realidad mundial cu Covid-19 a crea, pero pa sigui mantene discusionnan a base di experencia registra.
